Præsidentip tullersortaa nunatsinnukalersoq - Nuummulli Sisimiunullu angalanissat taamaatinneqartut
USA-p præsidentiata tullersortaa, J.D. Vance tallimanngorpat nunatsinnukalerluni unnukkut inoqutinut attaveqaatitigut X-ikkut marlunngornermi nalunaarutigaa.
Tassuma videoliami Kalaallit Nunaanni pissutsit qanoq innersut nammineq isiminik takorusullugit oqaatigaa, taamaammallu nuliani Usha Vance angalaqatiginiarpaa.
- Nunat amerlasuut Kalaallit Nunaat nunallu allat sioorasaarnikuuaat.
- Kalaallit Nunaat Danmarkimit piffissami sivisuallaami soqutiginngitsuusaarneqartoq isumaqarpugut. Tamannalu Kalaallit Nunaata sillimaniarneranut uggornartuuvoq, tamannalu nunarsuup sinnerani sillimaniarnermut aamma uggornartuulluni, præsidentip tullersortaa, J. D. Vance videomi oqarpoq.
Usha Vancep aamma J.D. Vancep pilersaarutit allanngortippaat, taakku pilersaarutaaqqaaraluartut allanngortillugit Nuummut Sisimiunullu tikeraassanngillat. Usha Vance qimussimik sukkaniuunneq malinnaavigisussaagaluarpaa, illoqarfinnilu taakkunani marlunni pilersaarutit tamarmik taamaatinneqartut, tusarfiup tutsuiginartup KNR-imut oqaatigaa.
Aappariit Pituffik Space Basemut tikeraassapput.
