Javami eqqugaasut ikiorniarnerat ajornakusoorpoq

Indonesiami Javami nunap sajunneranit eqqugaasunut ikiuiniutit anngunniarnerat ajornakusoorpoq.

Aqqusinerni ameqisuni biilerpassuit siuleriiaartut pissutigalugit, nunap arfininngormat sajorujussuarnerani eqqugaasunut tusindilippassuarnut nerisassanik, nakorsaatinik imermillu pajuttorniarneq ajornakusooqaaq.

Nunap sajunnerani ikiligaasorpassuarnut angerlarsimaffeeruttunullu ikiuutissat piffissaagallartillugu anngunneqarnissaat qulakkeerniarlugu, qaammatini pingasuni sukannersumik naalakkersuisoqarnissaanik Indonesiami naalakkersuisut peqqusipput.

Qaqqap innermik anitsisartup pujorusaartuarnera pissutigalugu, nunami sajuffiusumi ajunaarnersuaqarnissaa piareersimaffigineqareersimavoq, taamaammat

ajornartorsiortut pisariaqartissinnaasaannik amigaateqartoqanngikkaluarpoq, anngunniarnerili kisimik ajornartorsiutaasut, DR ilisimatitsivoq.

Javami inuppassualimmi nunap arfininngormat sajorujussuarnerani ajunaartut maanna 5.115-inngorsimapput. Inuit 20.000-t aqqunarsimassangatinneqarput, 200.000-nillu ikinnerunngitsut angerlarsimaffeerussimassasut, Naalagaaffiit Peqatigiit meeqqanut ikiuiniaqatigiiffiata, UNICEF-p, ilimagaa – qasserpiaaneralli suli ilisimaneqanngilaq.