Java Tsunamimik eqqugaaqqippoq
Indonisiap qeqertaata Java-p kujasissortaa, tsunamimik ullumi anguneqarmat, toqusut amerlassusaat akunnikkaarlugu amerligaluttuinnarput.
Nutaarsiassaqartitsiviit Javamiittut nalunaarput ikinnerpaamik inuit 80-it toqusimasut, sulilu 70-it nassaarineqanngitsut.
Ujaarineqartut ilagaat svenskit nukappiaqqat marluk, sisamanik qulingiluanillu ukiullit, ataataat 40-nik ukiulik napparsimavimmiittoq, nutaarsiassaqartitsivik TT oqarpoq.
Svenskit Nunanut allanut ministereqarfiat sulisuminnik ajunaarfimmut aallartitsipput, svenskit allat ajunaarfimmiissinnaasut attaveqarfigiartorlugit.
Immami Javap avataani nunap sajoreernerata kingorna tsunami pilerpoq. Nunap sajunnera Richter-skalami 7,2-tut uutorneqarpoq. Takunnittut oqaluttuarnerat naapertorlugu, tsunami 2 meterisut portutigisunik sineriammut mallertitsivoq.
Takunnittut oqaluttuarputtaaq, malissuit qaarnerminni illorsuarnik illunillu allanik sequmiatitsisoq.
- Tassanngaannaq malerujussuaqalerpoq, qattunernullu qimarrappugut. Inuit sisamat ilagisakka peqanngillat, arnaq imminut Teti-mik taasoq oqarpoq.
2004-mi tsunameqarmat Indonisia aamma eqqugaavoq, taamani inuit 230.000-it ajunaarput.