Jared Leto filmiliassaminut atugassaminik Ilulissani immiussisoq

Allattoq Jaaku Lyberth
septembarip 04-at 2007 10:46

Amerikamioq isiginnaartitsisartutut erinarsortartutullu tusaamaneqarluartoq Jared Leto sapaatip akunnerani kingullermi Ilulissaniippoq, isiginnaagassiassaminut atugassaminik Ilulissani immissiartorluni:

Jared Leto, isiginnaartitsisartoq ilaatigut Lord of War-imi kiisalu Alexander-imi isiginnaartitseqataasoq aamma sakkortunerusumik erinarsortartutut ilisarisineqarpoq.

Jared Leto tusaamasat allat ilaattut Issittumut silaannaallu allanngoriartorneranut tiguartisimaartunut ilaavoq.

Taamaammallu sapaatip akunnera kingulleq Ilulissaneeqqammerpoq. Jared Letop tikeraarnera allatulli suliumajunnaarnermik eqqugaagaluarpoq.

Hotel Arcticimi pisortaq Erik Bjerregaard tikeraartoqarsimanini pillugu ima oqaluttuarpoq:

Air Iceland attartorlugu Islandimiit toqqaannarlugu Ilulissiarput, ullorli ataaseq immiussiffissaq annaallugu kingusinaarput.

Jared Leto Arctic Hotelip eqqaani assilisinnermi saniatigut sermersuarmi iluliarsuullu qaani immiunneqarsimavoq, ilaatigullu Kangia tunulequtaralugu immiunneqarsimalluni, immiussinerillu tamarmik qulimiguulimmik attartornikkut ingerlanneqarsimasut Erik Bjerregaard oqarpoq. Eqqaavaattaaq Jared Leto nammineq igasuminik nassarami atortorpaalunnik attartortarsimasoq.

Jared Leto isiginnaartitsisartoq erinarsortartorlu tusaamasaq 27-nik malitseqarluni Ilulissanut tikippoq, ilaatigullu kalaallit qimmiinik puisitortillugit assilisassaminik attartorsimavoq, qimmilli perlilersimannginnermik neqit kuniulaaginnarsimammatigit pikkunaatsoorsimanerarpoq.

Jared Letop isiginnaagassiaq nipilersuutitalik sumik imaqartinniarsimagamiummita??

Nunarsuatsinni silap kissakkiartuinnarnera samminiaramiuk nunatsinni immiusserusussimavoq oqartariaqarpungalumi soorunalimi Ilulissat immiussiffissamisut toqqarsimagaa, Erik Bjerregaard oqarpoq.

ajoraluartumi tusaamasap apersornissaanut KNR angumersisimanngilaq.