- Nakkaqqaarama eqqissisimaniartupilussuuvunga taavalu aappara saammarsarlugu helikopteri aggilernerarlugu; utaqqeqqilaaginnarta helikopteri aggilerpoq, nukimmik tuniniarsaralugu, Jaqqa Gønvold oqarpoq.Assi: KNR/Marie Kuitse Kristensen

Jaqqa Grønvoldip kammalaatini qamuteralattoq annaaniarsarigaluarpaa

Jaqqa Grønvoldip kammalaatini marsi qaammat qamuteralatsilluni imaanut nakkartoq annaanniarsaritillugu nammineerluni imaanut nakkarpoq. Annaanneqarnissamilu tungaanut eqqarsaatit assigiinngitsut sarsuatissimaqai.

Nuup eqqaani Kangerluarsunnguani marsip arfineq pingajuanni qamuteralannik inuit marluk ajutoorput. Taakku sikukkut imaanut nakkarput.

Angut 41-nik ukiulik ajunaarpoq, angutip aappaa qaqinneqarluni annaanneqarpoq.

32-nik ukiulik Jaqqa Grønvold, annaassiniaqataasimasutut tallimanngornermi akissarsitinneqarpoq.

41-nik ukiullip nakkarneranut annaassiniartunit Jaqqa Grønvold siullersaalluni apuuppoq, taassumalu imaaniit qaqinniarsarigaluarpaa. Taassuma qamuteralattartut apummik sisoorfigitittut annanniutigisartagaanik nammattakkamik pullattartumik miloriussivigaa, 41-nik ukiulik puttasinnaaniassammat.

Taannali annaassiniartilluni imaanut nilleqisumut aamma nakkarpoq.

AAMMA ATUARUK 41-nik ukiulik Nuummi qamuteralannik ajunaartoq

Politiit ilisimatinneqareerput, qulimiguulillu annaassiniartussaq piareersarluni. Issitumi Sakkutooqarfiup alapernaarsuutaa Ejnar Mikkelsen aamma ajutoorfimmukartinneqarpoq. Taamaalineranilu 41-nik ukiullip timaa nillorsimaqaaq, nammattakkamillu pullattartulimmik puttatinneqarluni.

- Nakkaqqaarama eqqissisimaniartupilussuuvunga taavalu aappara saammarsarlugu helikopteri aggilernerarlugu; utaqqeqqilaaginnarta helikopteri aggilerpoq, nukimmik tuniniarsaralugu, Jaqqa Gønvold oqarpoq.

Jaqqa Grønvold 40 – 45 minutsit missaannik imaani utaqqinini eqqaamavaa. Minutsillu taakku ingerlaneranni eqqarsaatit sarsuasimaqaat.

- Taava imaaniinninni eqqarsalerpunga; ullaaq manna naggataamik takuara? Uanga tassa ullora tamaanga killeqarpa? Helikopterip utaqqinera sivitsortoorami. Taavalu sajuleriarama aqussinnaanngisannik assut annilaangalerlunga, piffissaq annertulaartoq kisimiinninni annilaangangaatsialeraluarpunga, soorunami eqqarsaaterpassuit sarsuapput.

Qulimiguulimmik aquttoq politeerlu isumataartariaqalersut

Qulimiguulik annaassiartortoq apuummat 41-nik ukiulik inuuneranik malunnaataarussimavoq.

Qulimiguulik annaassiniarnermi atorneqartoq annanniutaanngitsoq, politiit pisortaat, Bjørn Tegner Bay akissarsititsinermini erseqqissaatigaa. Taamaammat qulimiguulimmik ingerlatsisoq politiillu annaassiniartitsisuat malaatiinnarlugu isumataartariaqalerput.

- Sikup saappallaarnera peqqutigalugu qulimiguulik eqqaanut missinnaasimanngilaq, taamaammallu ilaasut malaatiinnarlugu isumataarlutik annaassiniartariaqalerput, Kunuup (politiit annaassiniartitaat) qulimiguulimmiit sikumit centimeterimininnguit qullasitsigilaarluni nivinngarluni tallimi illuatungaannaa atorlugu annaassivoq.

Jaqqa Grønvold Issittumi Sakkutooqarfiup umiarsuaanukaanneqarpoq, taanna ajutoorfiup ungasinngisaaniippoq. Qulimiguulik erngerluni 41-nik ukiulik inuuneranik malunnartuerussimasoq uterfigaa, taanna qaqinneqarmat piaartumik Dronning Ingridip napparsimmavissualiaanneqarpoq.

Taanna ikiueqqaarneq atorlugu uummarsarneqaraluarpoq iluatsinngitsumilli.

Jaqqa Grønvold ullumikkut peqqilluni suli inooqataanini qujamasuutigisaqaa. Taassuma Dronning Ingridip napparsimmavissuani timini uuttortarneqarluni allataavimmut allanneqarnera puigorneq ajorpaa, taamanimi 33 gradiinnarnik kiassuseqalersimagaluarpoq.

- Ullumikkut suli inuugama qujamasuutigaara. Taamani pisup nalaani tupaqqanikuunermut qisuariaateqarsimanngilanga, aatsaat angerlarama paninnguara takugakku qulliikka tassani kuulerput, taanna oqaluttuarpoq.

Kalaallit Nunaanni politiit Air Greenlandilu peqatigiillutik Air Greenlandip hangariani annaassiniarsimasunut immikkut akissarsititsipput. Akissarsitinneqartunit tallimaasunit Jaqqa Grønvold ilaavoq.

  • Joachim Hytten, Air Greenlandimi aquttoq
  • Kunuk Frederiksen, Kalaallit Nunaanni vicepolitiinspektøri
  • Poul Due Hansen, Qamuteralattartut peqatigiiffiat Qamutit
  • Jaqqa Grønvold, Qamuteralattartut peqatigiiffiat  Qamutit
  • Lars Borris Pedersen, Qamuteralattartut peqatigiiffiat  Qamutit

 

Foto: Marie Kuitse Kristensen.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl