Japanip siunnersuutaa akuerineqanngilaq

IWC-p ullup aappassaani ataatsimeersuarnerani Japan siuttuliullugu, nunat arfanniarfiusartut sinnerlugit nungusaataanngitsumik ilisimatusartarnermullu attuumassuteqartumik arfanniartalernissap ilaasortanit akuerineqarnissaa anguniarneqaraluarpoq.

Ukiuni kingullerni arlaqalersuni inuussutissarsiutigalugu arfanniartarneq uningatinneqarsimavoq. Ukiuni kingullerni qulini nunani arfanniarfiusartunit akuerineqarsinnaanerusumik ujartuineq ingerlasimavoq, ukiunilu makkunani nunat arfanniarfiusartut iluaqutigisinnaasaanik aaqqiisoqanngippat, IWC-p siunissaa nalorninartorsiulersinnaavoq.

- Nunat arfanniartarnermik akerliusut tungaanniit nunanut arfanniarfiusartunut isumaqatigiinniarsinnaaneq ajattorneqartuarsimavoq, Japanip aallartitaa oqarpoq.

Ole Samsing Danmarki sinnerlugu aallartitaasoq oqarpoq inuussutissarsiutigalugu arfanniartalernissamut siunnersuutigineqartoq pitsaanerulersinnaanngitsoq. Aamma ilanngullugu oqaatigaa siunnersuut akuerineqanngippat IWC-mi ilaasortat arlallit anisinnaanerat ilimagineqarsinnaasasoq.

- Siunnersuutip ukiuni arlaqalersuni akuerineqartannginnera utoqqatsissutissaarutilerpoq, Ole Ramsing naggasiivoq.

Arfanniartarnerup unitsivinneqarnissaa Australiap New Zealand-illu arlaleriarlutik sakkortuunik oqaasertalersorlugit oqariartuutigaat. Australiap aallartitaa Conall O´Connel oqarpoq, siunissami kinguaassat arferit takujuarsinnaasariaqaraat, nangillunilu;

- Qimmit qitsuillu nerlersorniaannarlugit arfanniartarneq akuerineqarsinnaanngilluinnarpoq.

Japanip siunnersuutigisaa, tassa ilisimatusarneq aallaavigalugu arfanniartarnissap akuerineqarnissaa nunanit taaseqataasunit 29-nit akerlilerneqarpoq, 23-nillu akuerineqarluni. Taamaasilluni Japanimi ilisimatusarneq aallaavigalugu arfanniartarnissap akuerineqarnissaanik siunnersuut IWC-mit akuerineqanngilaq. Japanip sinnersuutaanut atatillugu Danmark taaseqataanngilaq.

Japan-ip aallartitaa oqarpoq, siunnersuutertik akuerineqanngikkaluartoq, ilisimatusarneq aallaavigalugu arfanniartarnertik ingerlatiinnarneqassasoq.