Fumio Kishida partiimi sapaatit-akunnerata siuliani siulittaasutut qinerneqarpoq, sassartut pingasut allat tassani ajugaaffigalugit.Assi: AFP/Ritzau Scanpix

Japanip ministeriunertaava qinersisoqarnissaanik nalunaarutiginninniartoq

Japanimi ministeriunertut qinigaaqqammersoq, Fumio Kishida, ataasinngornermi qinersititsiniarpoq. Tusagassiorfik NHK taama allappoq.

Japanimi ministeriuninngoqqammersup Fumio Kishidap Japanimi inatsisartunut oktobarip ulluisa 31-anni qinersisoqarnissaa nalunaarutiginiarpaa.

Japanimi tusagassiorfik NHK taama nalunaaruteqartoq, tusagassiorfiup Reutersip allaaseraa.

Japanimi inatsisartut aappaanni Underhusimi ataasinngornermi ullaakkut taasisoqarmat 64-inik ukiulik Kishida, siornatigut nunanut allanut tunngasunut ministeriusimasoq, ministeriunertut akuersissutigineqarpoq.

Japanimi inatsisartut oktobarip ulluisa 14-ianni atorunnaarsillugit oktobarip ulluisa 31-anni qinersisoqarnissaa, Kishidap nalunaarutiginiaraa nutaarsiassaqartitsiviup Reutersip allaaseraa, ministeriunertut toqqarneqaqqammernini tassani atorluarniarsarigaa oqaatigineqarluni.

Ministeriunertut tunualersoq Yoshihide Suga, Japanimi ukiup ataatsip matuma siornatigut ministeriunginngorpoq, inunnillu isumasiuinerit naapertorlugit taamanikkut 70 procentinit tapersersorneqarluni.

Sugali sukkasuumik nuannarineqarunnaariartorpoq, taannami coronavirusip tuniluunnerata pakkersimaarniarneqarnerani aqutsinerluttutut nalileramikku.

Suga taamaalimmat partiimi naalakkersuisuutitaqartumi Liberal Demokratini siulittaasutut kingorna tunuarpoq.

Fumio Kishida partiimi sapaatit-akunnerata siuliani siulittaasutut qinerneqarpoq, sassartut pingasut allat tassani ajugaaffigalugit.

Taassuma naalakkersuisoqatini ullumi ataasinngornermi ilisaritinniarpai. Nutaarsiassaqartitsivik AFP taama allaaserisaqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl