Japanip Korea Avannarleq iliuuseqarfigaa

Japanip Korea Avannarlermut niueqateqarnini qaammatini arfinilinni unitsippaa pillaatitullu iliuutsit allat aamma atuutsilersillugit, Korea Avannarliup aningaasarsiornikkut eqqugaanissaa anguniarlugu. Pillaatit atulersinneqarput Korea Avannarleq ataasinngormat atombombe-mik misiliilluni qaartitsereersorlu.

Japanimi inatsisartuni amerlanerussuteqartut tunngavigalugit aalajangertoqarpoq. Japanip pillaatitut iluuseriniagaannut Korea Avannarleq akiniaalluni iliuuseqarniarluni qunusaarisimavoq, qanorli iliorluni akiniaanissaa ilisimaneqanngilaq.

Pillaatitut iliuuseriniakkat nutaat tassaapput, aasaq juulimi Japanip killilersuilerneranut ilassutitut iliuuseriniakkat. Killilersuilernermut pissutaavoq Korea Avannarliup qaartartunik ungasissumut igeriuttakkannik aasaq misileraanera. Taamaattorli nunat taakkua marluk akornanni annikitsuinnarmik niueqatigiinneqarmat, pillaatitut iliuuseriniakkat qanoq isummenermik ersersitsiniarnerinnaanerupput.

Aammattaaq Korea Kujalliup præsidentia Roh Moo-Hyun aamma Kinamiut qullersaat Hu Jintao oqarput Korea Avannarlermut ”naleqquttunik pisariaqartunillu iliuuseqassallutik”.

New Yorkimi FN-ip qullersaqarfiani Korea Avannarlermut pillaatitut aalajangersagassatut siunnersuut USA-mit ilungersuutigineqaleruttorpoq.