Japanip Irakimi sakkutuuni angerlartilerpai
- Sakkutuugut Irakimit angerlartinnialerpavut, Japanimiut ministeriunerat Junichiro Koizumi ullaaq taama nalunaaruteqarpoq.
Japanimiut 2004-p aallartinneranili 600-inik sakkutuuliipput. Tappavani tunngaviusumik inatsit 1947-meersoq naapertorlugu nuna sorsunnermi peqataasinnaatitaanngimmat sakkutuut illersuisussaatitatut taagorneqartarput. Inatsillu taannarpiaq tunngavigalugu Irakimi sakkutuujutitaqarneq innuttaasunit amerlanernit nuannarineqanngisaannarpoq.
- Illersuisussaatitagut ataqqilluinnarpakka qutsavigerujussuarlugillu navianarluinnartumik suliaqaraluarlutik nunaqqatigut sinnerlugit Irakimi sakkutuujusinnaasimammata, japanimiut ministeriunerat Junichiro Koizumi tusagassiortunik katersortitsinermini oqarpoq.
Irakimi ineritikkiartoqqinnissaq tapersersorniarlugu ministeriuneq aamma neriorsuivoq.
Japanimiut sakkutuui Irakimi nunap immikkoortuani al-Muthannami tuluit oqartussaaffigisaanni illersueqataasimapput. Japanimiut timmisartortartui amerikamiut sakkutuuinik atortuinillu assartuisarallassapput.
