Japanimiut piorsarsimassutsikkut nittarsaassinerat soqutigineqarnerusoq

Japanimiut filmiliaannik takutitsineq illoqarfiit pingaarnersaanni ippassaq ammarneqarmat filmit siulliit marluk takutinneqarput.

Filmit ippassaq takutinneqartut 144-nit isiginnaarneqarput, tassalu high-schoolertut pillugit filmiliaq Kirishima Thing, Japanimi 2013-imi pitsaanerpaatut toqqarneqartoq, aappaalu tassavoq titartakkanik filmiliaq aamma akissarsitinneqarsimasoq The Wolf Children 2012-imeersoq.

Katuami Hans Lyngep Inersua 508-nut inissaqaraluartoq, siorna isiginnaariartunut naleqqiullugu takkuttoqarneruvoq. Siornami 20-t 30-llu akornanniittut Japaniut filmiinik isiginnaariarsimammata, Katuap filmertarfiani pisortaq Inunnguaq Kristensen taama oqarpoq.

Japanimiut Danmarkimi aallartitaata Seishi Sueip pisortatigoortumik tikeraarneranut atatillugu filminik takutitsisoqarpoq, taassumalu aningaasaqarnermut nunami namminermullu naalakkersuisoq Vittus Qujaukitsoq peqatigalugu isiginnaariartut ippassaq tikilluaqquai, naalakkersuisorlu aamma oqalugiarpoq.

- Samurainik, kulturimik pissanganartumik japanimiullu nerisassioriaasiannik tuniinnarnata aamma karatemik, aikidomik, judomik, ninjamik, Godzillamik, sushimik, animemik allarpassuarnillu tuninikuuatsigut ullumikkut qutsatigeqisatsinnik, oqalugiarluni taama oqarpoq.

Naalakkersuisut naapertorlugit Japani ukiormanna immikkut sammineqartussaavoq, aamma kalaallit piorsarsimassutsikkut decembarip qaammataani Japanimut nittarsaassiartortussaammata.

AAMMA ATUARUK: Aleqa Hammond decembarimi Japanimut tikeraassaaq

Japanip Danmarkimi aallartitaata angalanini Ilulissani aallartippaa Danmarkimullu juulip sisamaani utissalluni.

Filminik takutitsinissamut pilersaarut

Juulip pingajuani
17:00-18:55: Leaving on the 15th Spring
19:00-21:15: Haru's Journey

Juulip sisamaani
17:00-17:45 Garden of words
17:50-18:55 5cm per second

Filmit akeqanngitsumik isiginnaariarneqarsinnaapput.