Japanimiut ilassarsiorput
Nunat tamalaat arfanniartarneq pillugu ataatsimiititaliarsuat IWC, Caribiami qeqertami Sankt Kittsimi juunip qeqqata missaani ataatsimeersuassaaq, ataatsimeersuarnissarlu sioqqullugu Japanimiut tapersersortissaminnik katersilereerput.
Japanimiut iluanaarniutigalugu arfarniartarnermik ammaasseqqusinerannut nunat tapersersuerusuttut Tokyo-mi ullumi ataatsimeeqatigissapput.
Japanimiut nunanut arfanniarnermik napaniuteqanngitsunut, akiliillutik tapersersortissarsiortutut pisuutinneqarnikuupput.
Manerassuarmi qeqertaq namminersortoq Tuvalu Australiamiut New Zealandimiullu aningaasannanniutigalugu arfanniartarnermut naaggaaqqusillutik kaammattuinerannut naaggaaqqammerpoq, avisi The Dominion Post taama allaaserinnippoq.
Japanimiut taama eqinnaallisaarnertik iluaqutigeriaannaavaat, IWC-mi tapersersortaat maanna amerliartuinnalersimammata. Taamaattorli iluanaarutigalugu arfanniartarnermik eqqussisoqassappat, IWC-mi ilaasortat sisamararterutaat akuersisinneqaqqaartariaqarput, tamannalu suli qularineqarpoq.
