Japanimiut ernumapput
Japanimiut ukiumut 1.000-inik arfattassinneqanngikkunik nersutaataannarminnillu inuussuteqalissagunik, tamanna orpippassuit piiarneqarnerannik kinguneqartussaassasoq, Japanimiut Danmarkimi aallartitaat, Masaki Okada, Ritzauimut nalunaaruteqarpoq.
Uumasunik illersuiniaqatigiiffiit arfanniartarneq pillugu Japani avoqqaarinerpaasarpaat, ilisimatusarneq aallaavigalugu arfanniarnerartariarlutik ilisimatuut misissugassaminnik ilanngaareeraangata neqaarniarfinni tuniniartarmatigit.
- Uagut Japanimiut aalisakkanik arfernillu nerisaqarneq qangarsuarmiit ileqqoraarput, peqqinnartunillu nerisassioriaatsivut nunanut tamanut siaruaannikkuullutik, Japanimiut aallartitaat oqarpoq.
Japanimi ilisimatuut misissuinerisa takutippaat soorlu tikaagulliit maanna ima amerlatigilersut, Japanimiulluunniit pisariniakkatik pisarigaluarpatigit ikiliartulernaviaratik.
Nungusaataanngitsumik piniarneq uagut aamma pingaartitaraarput. Naalagaaffiilli killiit ukiuni untritilinni aaqqissuussamik ima arfanniapilunnikuutigaat, allaat uumasut assigiinngitsut imminnut nerisariit amerlassusaat eqqarsaatigalugit tulluarunnaarsimallutik.
Arferit nungutaanissaminnik ulorianartorsiortinneqartut piniarneqarnissaat Japanimi inatsisit naapertorlugit sakkortuumik inerteqqutaareerpoq, Danmarkimi Japanimiut aallartitaat, Masaki Okada oqarpoq.
