Japanimiut arfanniarnerat akerliusut unitsippaat
Avatangiisinik illersuinianik taaneqartartut Sea Shepherd Conservation Sociatymeersut Japanimiut sikuiuitsumi kujallermi arfanniat sapaatip akunnerini arlalinni akornusersorsimavaat. Japanimiut februaarip qulingani nalunaarutigaat isumannaallisaaneq pissutiginerarlugu taqqavani arfanniarunnaarlutik.
Avatangiisinik illersuiniat umiarsuaasa ilaanni naalakkap oqaluttuaraa siornatigutut iliuuseqartarnermissut akornusersuinertik ingaassinertaqarsimanngitsoq inunnillu ulorianartorsiortitsisimanatik. Taamaallaat inatsisinik unioqqutitsillutik arfanniartut akornusersortarsimagitik. Taanna aamma oqaluttuarpoq arfanniat angallataanniit pilaffigisartagaannut umiarsuarnut annernut arfernik qaqitsiffigisartagaat assersortargitsik.
Japanimiulli nalunaarput akornusersuisut arfanniutit sarpiinut allunaasanik ilagutsitsiniaasarsimasut. Tamannali suli uppernarsineqanngilaq.
Naalagaaffiit imartaasa avataanni arfanniarneq 1986-imi inerteqqutigineqalerpoq. Japanimiulli arfanniarnertik ilisimatusarnermut tunngasuunerarlugu arfanniartuarput. Japanimiut arfanniarnerat marsip qeqqata missaani unitsittagartik aallarteqqinniassaneraat suli nalunarallarpoq.
