Japanimiu inunnik 19-inik inuartoq toqumut pillarneqartoq
Japanimiu 30-nik ukiulik, Satoshi Uematsu innarluutillit angerlarsimaffianni inunnik 19-inik 2016-imi toqutsisimasutut inunnillu 26-nik ikiliisimasutut toqumut pillarneqarpoq.
Reuters ataasinngornermi taama allaaserisaqarpoq.
Japanip oqaluttuarisaanerani inuartarinninnerit sakkortunersaasa ilagaat.
Satoshi Uematsup suliffigisimasamini innarluutillit angerlarsimaffianni savilersorluni inuartarinninnini nassuerutigaa.
Japanimi nakuusernikkut pinerluttuliornerit qaqutigoortut
Innarluutillit angerlarsimaffiat Plejecentret Tokyop kujataata kippasissortaani Sagamiharami inissisimavoq. Uematsup tassani najugallit ilarpassui sininneranni savimmik inuartarai.
Tamanna Japanimi annilaassutigineqaqaaq, Japanimimi nakuusernikkut pinerluttuliornerit qaqutigoortarmata, ilaatigut sakkunik nakkutilliinerup sukannersuunera pissutaalluni.
Tamanna Japanimi inuiaqatigiinni allannguisoqartariaqarnera pillugu oqallittoqalerneranik aamma kinguneqarpoq, inuimmi innarluutillit suli nikagineqarlutillu assuarineqartamata.
Nivinngagassanngortitaasoq
Inuit inoqatiminnik attaveqaqateqarsinnaanngitsut inuiaqatigiinnut nanertuutaasut, Uematsup qaammat kingulleq eqqartuussaanermini oqarsimasoq, Japanimi nutaarsiassaqartitsiviit allapput.
Inuartarinninnini inuiaqatigiinnut iluaqutaasoq aamma oqaatigalugu.
Uematsu eqqartuussisumit Kiyoshi Aonumamit nivinngagassanngortinneqarpoq. Uematsup peqqarniisaarluni inuartarinninnera eqqartuussisup tunngavilersuutigaa.