SpaceX: Japanimiu aningaasaatilissuaq qaammammik kaajallaasussanngortoq

Qaammammik kaajallaasussaq siulleq tassaavoq Japanimiu aningaasaatilissuaq Yasaku Maezawa. Taassuma Qaammammik kaajallaanissaa 2023-mi pisussatut pilersaarutigineqarpoq.

- Sapiitsuliortuuvoq, Musk oqarpoq.

Eqqumiitsuliortut arfinillit arfineq-pingasullu akornanniittut Qaammammuliarnissamut qaaqquniarlugit Maezawap oqaatigaa.

- Misigisaq taama immikkuullaritsisoq kisimiillunga misiginianngilara, Maezawa oqarpoq.

SpaceX-ip raketia nutaaq Falcon atorlugu Qaammammut Marsimullu angalasoqarsinnaanissaa pilersaarutaavoq, Elon Musk oqarpoq.

Raketip inuttaqanngitsup 2022-mi Marsiliartinneqarnissaanut piareersimanissaa sulissutigineqartoq, taassuma siusinnerusukkut oqaatigereerpaa, inuttalerlugulu 2024-imi angalasoqarnissaa pilersaarutaasoq oqaatigalugu. Piffissarli taanna eqquutsinneqarsinnaanngitsoq aamma ilisimaneqareerpoq.

Maezawalu angalanissamut qanoq akiliisimatiginersoq nalunaarutigineqanngilaq.

Inuit allat SpaceX aqqutigalugu avataarsualiartussatut allattorsimaffimmiittut tassaapput filmiliaritittartoq Leonardo DiCaprio, nipilersortartorlu Justin Bieber.

Russit avataarsualiartitsisarfiat inuinnaat akiliitillugit siusinnerusukkut avataarsualiartitsisarput, nunat tamalaat avataarsuani misissuisarfiannut ISS-imut angalatitsisarsimallutik.

/ritzau/