Innutaasut imerpallaaratik aammali annikippallaammik imeratik tassa naammaannartumik imertassasut peqqissutsimut oqartussaasut neriuutigaat, aviisi Guardian allappoq.Assi: Ryuta Ishimoto/flickr

Japanimi oqartussat inuusuttatik imigassanik aalakoornartutorneruleqqugaat

Japanimiut inooriaatsimiik coronap tuniluunnerani mattussinerni allannguinerminni imigassanik aalakoornartulittorpiarunnaarput. Tamanna Japanip aningaasaqarneranik eqquingaatsiarpoq.

Japanimi oqartussaasut inuusuttatik imigassanik aalakoornartutornerulernissaannik kaammattoraat, nunat tamat tusagassiorfii CNN ilanngullugu allapput.

Japanimiummi imigassanik aalakoornartutorpallaarunnaarsimapput, tamannalu nunarsuarmi nunat aningaasasiorluartut pingajuanni akileraarutitigut isertinneqartartunut maluniuppoq.

Imigassaarniarnermi aningaasarpassuit isertinneqartarput, imerniartarfiit kaaviaartitaannut imigassanullu immikkut ittumik akileraaruteqartarnermi.

Taamaattumik Japanimi akileraartarnermik oqartusaasut Sake Vivamik taallugu paasisitsiniaapput.

Innuttaasut 20-t 39-llu akornanni ukiullit paasisitsiniaanissami kaammattorneqarput - qanoq iliorluni imigassamik aalakoornartutornerulernissaannik isummaminnik nassiusseqqullugit.

AAMMA ATUARUK Japanip ministeriunertaava qinersisoqarnissaanik nalunaarutiginninniartoq

Isumassarsilluarnerpaallu akissarsitinneqassapput. Isumassarsilluarneqqussaanneq septemberip qulingiluaanut killeqarpoq.

Japanimi imigassartorpallaarunnaarneq inooriaatsimik coronaqarnerani mattussinerni allannguinermik patsiseqartinneqarpoq. Inuusuttut imigassartortarnerat annikinnerulersimavoq.

Innutaasut imerpallaaratik aammali annikippallaammik imeratik tassa naammaannartumik imertassasut peqqissutsimut oqartussaasut neriuutigaat, aviisi Guardian allappoq.

Allat oqartussaaasut imernerulernissamik kaammattuuteqarnerat tulluartuunnginnerarpaat - inuusuttummi peqqiilliornerulernissaat imigassamillu pinngitsuuisinnaajunnaarsinnaanerat kaammattuuteqartoqarnermi sillimaffigineqanngimmat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl