Japanimi nuna sajuppoq
Japanip kangiani immami manerassuarmi nunap sajunnerata kingunerisaanik malerujussuit meterinik qulinik portutigisut Japan-ip sineriaanut anngupput,
aseruatiterinerujussuarnik nassataqarlutik.
Malerujussuarnik tsunami-nik taaneqartartunik manerassuup annertunersaani aarlerisaarummik USA nassitsivoq.
Malerujussuit taakku manerassuarmut annguppata inuppassuit ajunaarnerannik kinguneqarsinnaasoq ujarassiooq danskiusoq oqarpoq.
Nunap sajunnerani Japan-imi illoqarfiit pingaarnersaanni Tokyomi illorsuit aalatinneqarput.
TV-ikkut assilisani takutinneqartut ilagaat inatsisartut ataatsimittarfianni politikerit tupaqqaqisut illorsuaq ataatsimiiffigisaat orraalermat.
Atomi atorlugu nukissiorfik Japani avannaata kangianiittoq ikuallalersimasoq nalunaarutigineqarpoq.
Nunap sajunnera richterip uuttuttaa malillugu 8,9-mik sakkortussuseqarpoq, nunap sajunnerata qiterpiaa Japan-imit kangimut 130 kilometerinik avasitsigisumiippoq, Japanip avannaani illoqarfissuup millioninik inoqartup Sendaip avataani.
Illoqarfissuup Sendaip umiarsualivia malerujussuarnik meterinik qulinik portutigisunit eqqorneqarpoq. Illut angallatit biilillu malerujussuarnit nassatarineqarput, sumiffinnilu amerlanerni ikullattoqarpoq. Tokyop avannaatungaani uulianut toqqorsivik aamma ikuallappoq.
