Japanimi nuna sajuppillarujussuaqqippoq
Nunap sajunnerata nalaani DR-ip ilanngutassiortua, akunnittarfimmi quleriit 35-anniittoq oqaloqatigineqarpoq:
- Tassanngaannaq nateq sajulerpoq kinguningualu iikkat neeqqululerlutik sulilu kinguninnguatigut illu tamarmi orraalerpoq, umiarsuarmiittutut misigisimanarluni, tamarmillu minutsit marlussuit ingerlanerinnaanni pillutik. Tupinnartorujussuuvoq. Eqqaamasariaqarporli illut nunap ajunnissaanut piareersagaapput, kisanni misigisaq eqqumiitsupilussuuvoq. Immaqa nunamiilluni suli eqqumiinnerusimassaaq, Jakob Illeborg oqaluttuarpoq.
Japanimi nunap sajunnerata kingorna nukissiorfiit atomimik ikummatillit annertuumik ajutoorfiureersullu, EU-mi nukissiorfiit atomimik ikummatillit 143-t sukumiisumik misissorneqarnissaat siunnersuutigineqarpoq.
Nukissiorfiit qanoq misissorneqassanersut EU-kommissionimi immikkut ilisimasallit sapaatip akunnerini tulliuttuni aalajangersassavaat. Isumannaallisaalluni misileeqattaarnissat ukiamut ingerlanneqarsinnaanissaat ilimagineqarpoq.
Nunat EU-mi ilaasortat amerlaqisut nukissiorfiit atomimik ikummatillit pingitsoorsinnaanngilaat - soorlu nukissiap Frankrigip atorfissaqartitaata 80 procentia nukissiorfinnit atomimik ikummatilinneersuuvoq.
