Japanimi atuartut robotit atorlugit tuluttut ilinniartinneqartalissasut
Japanimi meeqqat atuarfianni atuartut tuluttut ilinniartinneqartarnerat misileraaffiulerpoq, tassami atuartut robotit atorlugit tuluttut ilinniartinneqarnissaat misilerarneqarnialersoq, Japanip ilinniartitaanermut ministereqarfiata nalunaarutigaa.
Allattoq Ritzau
aggustip 23-at 2018 11:40
Nutserisoq Mads Lynge
Japanimi atuarfinni tuluttut ilinniartitsisussaaleqisoqartoq nutaarsiassaqartitsiviup AFP-p ilaatigut allaaseraa, robotillu tuluttut ilinniartitsisinnaanissamut piginnaanilersukkat inini atuarfiusuni ilinniartitsinermi ikiortitut aappaagumit takuneqarsinnaalissapput.
Atuartut ilinniartitsisullumi tuluttut piginnaasaasa robotit immikkuullarissut atorneqalernerisigut pitsaanerulersinnaanissaat neriuutigineqarpoq. Atuartut ilinniartitsisullumi tuluttut ilaatigut piginnaanikippallaartutut oqaatigineqartartut, atorfilittat ilaata oqaatigaa:
- Atuartut tuluttut taaguillaqqissusiat robotinit misissorneqarsinnaavoq, ilinniartitsisut sapernartissinnaasaannik misissuisinnaassallutik, atorfilittat ilaat robotit pillugit oqarpoq.
/ritzau/
