Japanimi ajunaarnersuaq annertussangatinneqarpoq
Japanimi Sorsunnersuup kingulliup kingorna aatsaat taama ajornartorsiortoqartigilersinnaasoq, Japanip ministeriunerata Naoto Kanip oqaatigaa.
Allattoq Mads Lynge
marsip 13-at 2011 13:12
Japanimi innuttaasut ikioqatigiinnissaannik ministeriunerup kaammattorpai.
Atomimik nukiliorfiup Fukushimamiittup reaktoriata aattoornissaa aarleqqutigineqarpoq. Atomimik nukiliorfik taanna Tokyomiit 250 kilometerisut ungasitsigisumiippoq.
- Reaktorip immamik nillorsarniarneqarnera neriuutissaarunnermit iliuuseqarneruvoq, atomimik nukiliornermik immikkut ittumik ilisimasalik Robert Alvarez nutaarsiassaqartitsivimmut AFP-mut oqarpoq.
Ikummatissat nillorsarneqarsinnaassanngippata reaktori aattoorsinnaavoq, qinngornernillu radioaktiviusunik aniasoqarsinnaalluni.
Ajunaarnersuup annertussusaa suli ilisimaneqanngilaq, inuilli 10.000-it sinnerlugit ajunaarsimanissaat eqqoriarneqarpoq.
