Japan anorersuarujussuarnissaanut piareersartut

Qaammat ataaseq qaanngiuppoq anorersuarujussuaq alla Tokoyp eqqaannut anngummat taamani innaallagiaaruppoq aqqusinerminilu angallannerit akornuserneqarlutik.

Rugbyerluni VM-imi unamminissat marluk arfininngornermi pisussaagaluartut anorersuarujussuarnissa pillugu taamaatinneqarput, aaqqissuisut taama ilisimatitsipput.

Unamminissaq alla aamma anorersuarujussuarnissaa pillugu allannguuteqarfiuvoq, Japanimiut Formel 1 granpriximik unamminissaat arfininngorpat pisussaagaluartoq sapaammut nuunneqarpoq.

Japanimi kingullermik taama sakkortutigisumik anorersuarujussuarpoq 1958-mi.

Taama nalunaaruteqarpoq Japanimi silasiorfik.

Timmisartuutileqatigiiffiit arlaqartut aalajangereerput arfininngornermi timmisartuussinissat 1100-nik amerlanerusut taamaatinneqartut.

Tokoyp eqqaani qimuttuitsut arfininngornermi aallarnissaat amerlasuut aamma taamaatinneqarput.

Anorersuarujussuaq Hagibis tallimanngornermi Japanip kitaani qeqertamit Chichi Jimamit 410 kilometerisut ungasitsigisumiippoq.

Anorersuarujussuup kaavittuliornera avannamut kimmut akunnermut 25 kilometerisut sukkatigisumik illuariartorpoq akunnermullu 252 kilometerisut sakkortutigisumik anoraasuartarluni, Japanimi silasiorfik taama paasissutissiivoq.

Anorersuarujussuaq Faxai qaammatip matuma siorna Japanip kangiatigut aqqusar mat, aamma Tokyo aqqusaarmagu inuk ataaseq ajunaarpoq inuillu 130-it ikiligaallutik.

Japanimi nunap immikkoortuani Chibami illut tusintillit sapaatit akunneri marluk innaallagiaqaratillu imeqanngillat.