Inuit sunniuteqarnerpaat allattorsimaffiinut Bono ilaavoq. Taamatullu aamma USA-mi præsidenti, George W. Bush, præsidentiusimasoq, Bill Clinton, aamma Bill Gates akuullutik.
Inuit nunarsuatsinni sunniuteqarnerpaatut amerikamiunit isigineqartut untritillit siulliit USA-mi aviisersuup, Time Magazinep, tamanut saqqummiuteqqammerpai.
Atuakkiortoq akerlijugajuttoq, avatangiisillu pillugit oqallissaarisartoq, Bjørn Lomborg, sunniuteqarnerpaat ilaattut allatorsimaffinnut 2004-mi ilaavoq, tamatumuunali akuunani. Danskerli alla, Janus Friis, allassimasunut ilannguppoq.
Internetikkut Skype atorlugu akeqanngitsumik oqarasuaatikkut oqaloqateqarsinnaaneq Janus Friisip svenskeq Niklas Zennstrøm peqatigalugu pilersissimavaa, angutillu taakku marluk “The Skype Guys”-it allattorsimaffianni tassa ilanngunneqarsimapput.