Jan Øberg: Saammaasseqatigiittoqarsinnaavoq

Danmarkip nunarput nunasiaatigisimanerata kingorna kalaallit danskillu saammaasseqatigiinnissamik kissaateqassappata, saammaasseqatigiinnissaq pillugu kommissioniliortoqarsinnaasoq, nunat akornanni nunalluunniit nunasiaateqarsimasut aaqqiagiinngittarnerannik ilisimatusarsimasoq Jan Øberg isumaqarpoq.

Jan Øberg inuiaqatigiit aaqqissugaanerisa pillugit philosofiimi doktoriuvoq, eqqissinermut aaqqiagiinnginnernullu ukiorpassuarni ilisimatusartuarsimavoq.

Jan Øberg nunat tamalaat siunissami eqqisseqatigiinnissaannik Sverigimi ilisimatusarfimmi aamma pisortaasoq oqarpoq kalaallit akornanni isumaqartoqarsimappat danskit oqartussaavallaarsimallutillu pissaaneqarpallaarsimasut, taava Danmarki Kalaallillu nunaat saammaasseqatigiinnissaq pillugu kommissioniliorsinnaasut.

Nunasiaateqarneq eqqarsaatigalugu Kalaallit nunaat Danmarkilu imminnut sorsussimanngikkaluarlutik kisiannertaqarnerarpaa.

- Paatsorsimanngikkuma, kalaallit ilai misigissimapput qalliuniarfigineqarlutik, soqutigineqaratik, inuiaat immikkuullarissutut isigineqaramik perorsartariaqartut, qallunaanngorsartariaqartullu. Taamatullu misigisimasoqassappat naalagaaffimmi Damarkimi qallunaat kalaallinut eqqunngitsumik iliorsimallutik paasilluinnartariaqarpaat nassuerutigalugulu, Jan Øberg radioaviisimut oqarpoq.

- Taamaammat Ilisimatusarfimmi oqaluugiaateqarninni siunersuutigineqarsinnaasutut taavara saammaasseqatigiinnissaq eqqortullu saqqummiunnissaa pillugu kommisioniliortoqarsinnaasoq. Qulaajaanerillu ingerlanneqareerpata inuiaqatigiinnut paasissutissiisutigineqarsinnaavoq saammaasseqatiginnerlu piviusunngorsinnaavoq.

Inuinnarnullu tutsissagaanni Jan Øbergi assersuusiorpoq.

- Assersuutissaalluarpoq inuit paquminartuuteqarsimagunik kamassuteqarsimagunilluunniit nipangiuttarpaat kingusinnerusukkullu aniatissagaangamikkik, toqqortaatitik sakkortuninngorlutik anillattarput, anillatsitsinngikkaangatami inoorusussuseeruttoqartarpoq, Jan Øberg oqarpoq.

Taamaammat kalaallit misillersimappata Danskillu nassuersinnaagunik saammasseqatigiinnissaq piviusunngorsinnaavoq.

Jan Øberg Italiami eqqissinissamik suliaqartarnini pillugu 2003-mi nersornaasigaasoq aatsaat nunatsinniippoq, Ilisimasarfiullu oqalugiariartoqqullugu qaaqqusimavaa.