James P. Cain Nuummut tikippoq

Amerikamiut aallartitaat James P. Cain Nuummut ullumi tikippoq. Naalakkersuisut siulittaasuat, Hans Enoksen, ualeq ataatsimeeqatigaa, naalakkersuisullu siulittaasuata tullia, Josef Motzfeldt, kinguninngua aamma ataatsimeeqatigalugu.

Kingorna Nuummi takornarniartinneqarpoq, aallartitarlu, nulii qaaqqusallu peqatigalugit, Hans Egede-p Illuani unnuk-manna nereqatigiipput, Naalakkersuisut qaaqqusisoralugit.

Ataatsimeersuarnissaq Joint Commitee-mik taaneqartartoq Københavnimi maajip naalernerani pingajussaanik ingerlanneqartussaq sioqqullugu aallartitaq Kalaallit Nunaannut tikeraarpoq.

Igalikumi 2004-mi isumaqatigiissummik taaneqartartumut atatillugu Kalaallit Nunaata USA-llu suleqatigiinnerulernissaat ataatsimiititaliap siunertaraa.

Amerikamiut aallartitaat Nuummiit pingasunngorpat Ilulissiassaaq, Sermersuarmut ilaatigut takornarniassalluni. Kalaallit Nunaanni Timersortartut Kattuffianni siulittaasoq, Nuka Kleemann, aallartitap aamma ataatsimeeqatigissavaa.

James P. Cain timersornermik soqutigisaqarluartuuvoq, ishockeyrtartuuteqarsimalluni. Kalaallit Nunaanni ishockeyrtartoqannginnera aallartitap tupigusuutigisimagaa tusatsiakkanut ilaavoq.