Jakobsen: Inunnguuseralugu oqaatsit misilitsitsitsissutigineqartalerlik

Meeqqat atuarfianni ilinniaqqiffinnilu tamani ilinniartitsissutini oqaatsinik misilitsiffiunngitsuni, soorlu matematikkimi uumaatsulerinermilu inunnguuseralugu oqaatsit atorlugit misilitsissinnaalernissap aqqutissiuunneqarnissaa, Inatsisartuni ilaasortap Siumumeersup Doris Jakobsenip siunnersuutigaa, imalu tunngavilersuivoq:

- Inuit pisinnaatitaaffiinut tunngavoq, aamma karakterit qaffasinnerusut oqalutseqartalernikkulluunnit immaqa anguneqarsinnaagaluarput. Doris Jakobsen oqarpoq.

Doris Jakobsenip siunnersuutaa Inatsisartunit aappassaaneerlugu oqaluuserineqartussaavoq, siullermeerneqarmallu Naalakkersuisut itigartitsipput, oqalutsinut aningaasartuutissat amerlavallaarnissaat tunngavilersuutigalugu. Taamaattumik Doris Jakobsenip siunnersuutaa Naalakkersuisut atuartitsinermi nutserisarneq pillugu 2004-mit ukiakkut misissuisitsilernerannut ilanngullugu misissugassatut innersuussutigaat.

Inunnguuseralugu oqaatsit atorlugit misilitsittalernissamut siunnersuut ilinniartunit qanoq isumaqarfigineqarnersoq paasiniaavugut, siunnersuullu pitsaasutut isigineqarsinnaagaluartoq apeqquserneqarsinnaasoq, Avannaani Ilinniarnertuunngorniarfimmi Aasianniittumi soraarummeertussanngortoq, elevrådimilu ilaasortaq Juliane Henningsen isumaqarpoq.

- Isumaqatigivallaanngilara. Atuartitsinerit atuartitsissutillu, kalaallisut atuartitsineq eqqaassanngikkaanni, tamarmik qallunaatut allassimapput. Taamaattumik takorloorsinnaanngilara, soorlu matematikkimi kalaallisut oqaatsikka atorlugit misilitsittalissagaluaruma, pissusissamisuuginnarpoq qallunaatut ingerlatakka qallunaatut misilitsiffigigukkit. Juliane Henningsen oqarpoq.