Jakob Skade: Royal Greenlandip nunaqarfinni tunitsivii tunineqarlik

Royal Grenlandip tunitsivii imminut akilersinnaaatik matoqqasut Nunaqarfimmiunut tunniunneqartariaqartut, Kattusseqatigiit Partiiat isumaqarpoq.
Allattoq Jens Thorin
maajip 11-at 2010 19:59

Royal Greenlandip tunitsivii imminut akilersinnaanngitsut nunaqarfimmiunut tunisigit, nunaqarfimmiut tunisassiorfissuarmullu tamanna iluaqutaanerussaaq. Katusseqatigiit Partiianneersoq Jakob Skade taama isumaqarpoq.

- Inuit aningaasarsiorusunnerat isummernitsinni qitiuvoq. Tunitsiviit imminut akilersinnaanngitsut tunniukkaanni, nunaqarfimmiunut suliffeqarfissuarmullu iluaqutaassaaq. Aammali akiliilluni pisiariumaneqarput, taava aningaasat taakkua suliffeqarfissuarmut iluaqutassapput, Jakob Skade oqarpoq, Ruth Heilmannip siunnersuutaa, siullermeerneqarami amerlanerussuteqartunit itigartinneqareertoq, taperserlugu.

Royal Greenland ilaannaaluunniit namminersortunut ingerlatassanngortinneqassappat pitsaaqutit pitsaanngequtillu pillugit Naalakkersuisut nassuiaasiussasut, Ruth Heilmann siunersuuteqarpoq, marlunngornermi aappassaaneerneqartumik.

Naalakkersuisut ersarissumik isummereerput: Namminersortunngorsaanissamik oqaluttoqalersinnagu, suliffeqarfissuaq aningaasaqarnerminik iluarsiiniarnermini piffissaqartariaqarpoq.

Ruth Heilmannip siunnersuutaa marlunngornermi oqaluuserineqarmat, partiit naalakkersuisuutitaqartut annerit Inuit Ataqatigiit Demokraatillu itigartitsipput. Naalakkersuisuutitaqartunili minneq, Kattusseqatigiit Partiiat, illua tungiulittunut taaseqataavoq.

Sooruna illua tungiliuttut taaseqatigitit?

- Qineqqusaarnermi oqaatigisavut aalajangiusimavagut, tassalu Royal Greenlandip nunaqarfinni tunisassiorfiisa neqerroorutigineqarnissaat, Jakob Skade akivoq.

Siunnersuut taasissutigineqarmat, 14-it akuersipput, taakkununnga Jakob Skade ilaalluni. 17-it amerlanerussuteqarlutik itigartitsipput.