Jakob Sivertsen suli qinigassanngortikkusuppoq

Atassut sinnerlugu ukiorpassuanngortuni inatsisartunut ilaasortaasimasup, Jakob Sivertsen- ip novemberip 15.- iani inatsisartunut qinersinermi Atassut sinnerlugu qinigassanngortissinnaanissi suli neriuutigaa.

Jakob Sivertsen septemberimi Tasiilamut angerlartilluni aalakoorpallaarnini pissutigalugu Kangerlussuarmi isertitsivimmiitsitaanermi kingorna parteeqatiminit inatsisartunut qineqqusaarnissaminut mattunneqarpoq.

- Ukiorpassuarni Atassut sinnerlugu inatsisartuni ilaasortaasimavunga, taamaattumik pisoq pillugu pinerlussimasutut nalilerneqarnera akuerisinnaanngilluinnarpara, Jakob Sivertsen oqarpoq.

Jakob Sivertsen oqarpoq Air Grennlandimut aamma politimestereqarfimmut Kangerlussuarmi pineqarnini pillugu maalaaruteqarsimalluni.

- Pineqarnera allagaqaatigalugu ingerlateqqippara. Sulilu neriuutigaara ukiorpassuarni partii ilaasortaaffigisimasara Atassut sinnerlugu inatsisartunut qinigassanngortissinnaassallunga. Ulluni qaninnerni parteeqatikka saaffigeqqinniarpakka, Jakob Sivertsen oqarpoq.