Jakob Sivertsen, Atassut, kisiartaalluni taaseqataanngilaq

Atassummi sivisunerpaamik ilaasortaasimasoq Jakob Sivertsen angutaavoq aalajangersimalluinnartoq. Qinersinissaq ullormi aalajangersimasumi pissasoq nalunaarutigisimagaanni, tamanna allanngortiinnarneqarsinnaanngilaq.

Ulloq qinersivissaq siuartinneqarmat Jakob Sivertsen Inatsisartunut ilaasortani kisiartaalluni nikueqataanngilaq.

Qinersinissaq Jakob Sivertsenip tapersersorluinnarlugu oqarpoq, taamaallallu aningaasamut inatsisissaq pillugu allanngortoqarsimanera nammineq akuersaarsinnaanagu erseqqissaatigaa.

Naalakkersuinikkut piffissami kingullermi eqqissiviilliornerparujussuit – aningaasanik ilassinnissutinik atornerluinerit, aalisarnermut eqqunngitsumik nalunaarusiornerit, maanaannaq qinersisitsariaqartarneq, Jakob Sivertsenip assut kipiluttunarnerarpaa.

Ukiut 27-ingajaat matuma siorna partiit marluinnaapput, taamanikkullu isumaqatigiinngissinnaasaraluarlutik naapissinnaasarlutik qalleqqissaatigaa.

Maanaannaq qinersisitsisoqalernera pissutigalugu Jakob Sivertsen qinigassanngorteqqinniarpoq.

Jakob Sivertsenip aamma erseqqissarpaa partiimi avissaartuuttoqanngitsoq, ikittunnguugamillu suleqatigiilluarlutik oqarpoq.

Atassutip siulittaasortaavata Finn Karlsenip Jakob Sivertsenip taaseqataannginnera ajornartorsiutitut isiginnginnerarpaa, partiimilu ajornartorsiuteqarnatik ilanngullugu aamma qalleqqissaatigalugu.