Jakob Sivertsen aningaasanik taarsiivigeqquvoq

Inatsisartuni Atassut sinnerlugu ilaasortaasimasoq, Jakob Sivertsen, Atassutip Partiianut minnerpaamik 100.000 koruuninik maanna piumasaqaateqarpoq.

Inatsisartunut qinersinissaq oktoberip qaammataani suaarutigineqarmat Jakob Sivertsen Inatsisartunut qineqqusaarnissaminut itigartinneqarpoq, kisimiilluni qinigassanngortinnissani taamaalillunia alajangiuttariqalerlugu.

Atassutip qullersaqarfianut Jakob Sivertsen allagaqarluni oqarpoq, qineqqusaarnerup nalaani partiimut ajortisaarerusunnani, eqqunngitsumik akuerineqarsinnaanngitsumillu pineqarnini aatsaat maanna saqqummiukkini, aningaasatigut piumasaqaatitalimmik siulersuisuunernut ingerlatitseqqilluni.

Jakob Sivertsenip erseqqissaatigaa, inatsisartunut qinigaasimasut qinersisoqalersillugu inummut ataatsimut 100.000 koruuninik, aamma taaneqarnerit najoqqutaralugit, tapiiffigineqartarmata, namminerli Atassutip siulittaasuanut Atassut tunuliaqutaralugu qinigassanngorteqqusaanngeriarluni, qinersinermi kingullermi Atassummut qinikkatut tapiiffigineqarnini koruunimik ataasinnguamilluunniit pissarsissutigisimanagit.

- Atassummut qinigassanngortittut allat uanga tapiiffigineqarnikkut pissarsiannik akilersorlugit illoqarfinnut allanut qineqqusaartinneqarput, uangalu eqqaaneqarmanga, Jakob Sivertsen allappoq.

Piumasaqaatini akuerineqanngippata eqqartuussiviit

aqqutigalugit suliassanngortitsinissani Jakob Sivertsenip sulissutigerernerarpaa, Atassummilu siulersuisuunernit piffissaq sukkanerpaaq atorlugu akineqarnissani piumasaralugu.

Kangerlussuarmiit Kulusummut timmisartumik angalaqqinnissaminut Jakob Sivertsen itigartinneqarpoq, imigassartorsimanerup kingunerisaanik nuanniitsuliorsimanini pissutigalugu Kangerlussuarmi isertitsivimmiitinneqartariaqarsimalluni. Tamatuma pisup kingorna Atassut tunuliaqutaralugu qinigassanngortinnissaminut itigartinneqar.

Inatsisartunut marlunngormat qinersinermi Jakob Sivertsen 66-init taaguunneqarpoq.