Jakob Larsen assammik arsarnermi arnat nunanut allanut unammisartuini sungiusaasunngorpoq

- Ineriartupiloornermi oqaluttuassaq nutaaq.

Timersoqatigiit assammik arsartartut kattuffiat TAAK arnani nunanut allanut unammisartuni nuna tamakkerlugu sungiusaasutut Jakob Larsenip atorfininnera pillugu tusagassiuutinut nalunaarummi arfininngornermi ullup qeqqanut nassiunneqartumi taama oqaasertaliivoq.

Jakob Larsen assammik arsarnermi angusaqarsimaqaaq. Tamanna illoqarfimmi meeraaffiani Ilulissani aallartittoq NÛK-mi Nuummi nangippoq kingornalu ilinniaqarniarluni assammillu arsarnermi aallussiniarluni Danmarkimut nuulluni.

Arlaleriarluni GOG peqatigalugu pissartanngorpoq aamma kalaallit nunanut allanut unammisartut peqatigalugit pingasoriarluni VM-eqataalluni, nunarsuarmi pissartanngorniuteqataalluni. Unammisartuujunnaarami assammik arsarnermiiginnarpoq taamalu Europami assammik arsartartut kattuffissuata EHF-ip iluani pikkorinnerni sungiusaasutut ilinniarluni.

- Jakob Larsen tassaavoq arnani nunatsinnut unammisartunut sungiusaasussatut tulluartoq. TAAK maanna ineriartortinneqarluni aaqqissuussaanikkut nukittorsarneqarluni ingerlasuuvoq. Siulersuisut anguniagai ataatsimoorluta anguniakkatsinnut naleqqupput – tassunga VM-imut juunimi 2027-mi anngunniunnissamut  ilaalluni, TAAK-mi siulittaasoq Carsten Olsen oqarpoq.

Utertitsinissamut piffissanngorpoq

Jakob Larsen inuussutissarsiutigalugu Horsen Håndbold Elitemi sungiusaasuuvoq taakkulu Danmarkimi håndboldligami unammisartuupput. Taamatullu atorfeqarnera kalaallinut sungiusaasunngorneranut aporfiunngilaq.

- Kalaallit Nunaanni assammik arsarnermik tapersersuinitsinnut nuannaarpugut. Suleqatigiinneq nunat akornanni isumassarsiorfiusarluni nukittorsaaqataalluni Kalaallit Nunaanni Danmarkimilu assammik arsarnerup ineriartortinneqarneranut iluaqutaavoq, HHE-mi siulersuisuni ilaasortaq Jørgen Møller oqarpoq.

Jakob Larsen aamma piareersimavoq misilittakkaminik kalaallinut unammisartunut tunniussaqarnissaminut.

- TAAK- ip aaqqissuussaanikkut nukittorsarnera siulersuisullu anguniagai nammineerlunga anguniakkannut naleqqupput Kalaallit Nunaanni assammik arsarnerup iluani. Ataatsimoorluta anguniakkagut piviusunngortissavagut – tassaniippoq kalaallit nunanut allanut unammisartut VM-imut anngutsittarnissaat. HH Elite-p periarfissamik immikkuullarissumik akuersissuteqarnera qujassutigaara, qilanaaqaangalu attuumassuteqartut tamaasa peqatigalugit nukittuumik suleqataanissamut, Jakob Larsen oqarpoq.

Kalaallit arnat VM-imut anngunniullutik unamminissaat tulleq 2027-mi pissaaq.