Jakob Janussen: Qatsussineq qinersiartortunik ikilisitsivoq
Aamma Nuummi Ilulissanilu qinersiartortut malunnartumik ikileriarput, Qaqortumi procentimik ataatsimik ikileriarlutik.
Qinersinermik naliliisartoq Jakob Janussen isumaqarpoq, qineqqusaarnermi aporaattunik nalunaaruteqartarnera, qinersisartunik paatsiveerutsitsisoq.
Illoqarfinni Sisimiuni, Nuummi Ilulissanilu tallimanut taasiartortut kingullermik qinersinermut sanilliullugu taamak malunnarluartigisumik ikileriarnerat, Jakob Janussen-illu marlussunnik nassuiaatissaqarsoraa.
- Siullermik qinersisartut ilaat isummanik imminnut akerleriilluinnartunik anngussivigineqaraangamik ilaanneeriarlutik qanoq qisuariassanerlutik nalornilersinnaasarput, taamaalillutillu taasinngitsoorsinnaasarlutik taasivissartilluunniit allaffiginagu tunniussinnaasarlugu.
Aappaatullu, politikerit suliassavitsik pivallaarnagu soorlulusooq imminnut kimmaaterusaartuarnerat, qinersisartut ilaasa tusagassiorfitsigullu taallattaagaat, qinersisartunut politikkimut alartitsisinnaasarpoq, knr-ip qinersinermi naliliisartua oqarpoq.
Qinequsaarneq aammassiartortoq partiit arlallit nalunaarput, kikkut naalakkersuisooqatigiumannginnerlugit. Taamaaliornikkut qinersisartut taasassatik allanngortissimanerpaat?
Taanna akissallugu nalorninarneruvoq. Isumaqarpungami suleqatigiinniaannavilluni suleqatigiittoqarsinnaanngitsoq, pingaarnerusolu unaasoq; apeqqutinuku suut tungavigalugit suleqatigiissinnaasugut, aamma qanoq sivisutigisumi suleqatigiissinnaavugut?
Tassami nunap sumut ingerlanissaa paatsiveerunneqarsinnaavoq, taavalu piffissap sivikitsup iluani politikikkut nikeqattaartoqalersinnaalluni, Jakob Janssen oqarpoq.