Jacob Abelsen: Soraarsitaanngilanga

Kalaallit Nunaata Ammeriviani aningaasaqarnermut pisortaasimasup Canadamilu puisit amiinik pisiortortoqartarneranik maanna isornartorsiuisup, Jacob Abelsenip, naatsorsuutit marloriarluni isumaqatigiinngissutaaneri peqqutigalugit piumaffigineqarluni suliffimminit anisitaasimaneragaanini isumaqatiginngilaa.

- Nammineerlunga soraarniuteqarpunga. piumaffigineqanngilanga. Pitsaanerusumik neqeroorfigitippunga, Jacob Abelsen radioavisimut taama oqarpoq.

Kalaallit Nunaata Ammeriviani pisortap Michael Nielsenip Ammerivimmilu siulersuisuni siulittaasup Anders Brønsip nalunaarutigaat naatsorsuutit peqqutigalugit Jacob Abelseni soraarniuteqarnissaa piumasarisimallugu. Anders Brøns Jacob Abelsenip suliffiutaani Polar Seafoodimi sulisitsisuuvoq.

- Naatsorsuutit immikkut oqaasertalersorneqarsimanerat ilumoorpoq. Suliassanik agguataarinissara pikkoriffigivallaarsimanngilara. Ammerivimmilli piumaffigineqarlunga suliunnaarsimanngilanga. Isornartorsiuinera allamut saasarniarlugu taamatut nalunaaruteqartoqarsimasinnaavoq. Suussupaginnittoqarpallaaqaaq, Jacob Abelsen oqarpoq.