Jørgen Høy Kalaallit Nunaanni suliffeqarfinniit tunuarpoq
Danskeq inuussutissarsiornerup tungaatigut nunatsinni ilisarisimaneqarluartut ilaat, Jørgen Høy, nalunaarpoq Nunaoilimi aamma Royal Arctic Linemi siulersuisunut qinigassanngorteqqinniarnani.
Jørgen Høy, maanna 72-inik ukioqartoq, 1960-imili nunatsinni sulilerpoq, KGH-p angallannermut immikkoortortaani taamani atorfinikkami.
Timmisartuutileqatigiiffimmi Grønlandsflymi 1965-imi atorfeqalerpoq, 1979-p tungaanut tassani suliffeqarluni, ukiut kingulliit arfinillit pisortaanertut.
Kalaallit Nunaanni suliffeqarfiit assigiinngitsut siulersuisuini taamanili ilaasortaasalerpoq, maannali tassa tunuavinnissani kissaatigilerlugu.
- Nunaoilimi Royal Arctic Linemilu siulersuisunit tunuaraluarlunga, Kalaallit Nunaat qaquguluunniit puigornavianngilara, Jørgen Høy oqarpoq.
