Inuunerittap Aningaasaateqarfianit agguaassisoqarpoq
Katillugit suliniutit 29-t ukiaq manna aningaasanik tapiiffigineqarput, katillugillu 323.039 koruunit agguaanneqarput.
- Imigassamik hashimillu atornerluineq Nunatsinni innuttaasut peqqissuunissaannut ajornartorsiutaanersaapput, Steen Lynge oqarpoq.
- Atornerluisuuneq akiorniassagutsigu pisortat inuillu namminneq suliniuteqarnerisigut annertuumik suliniuteqartoqarnissaa pisariaqarpoq. Taamaammat nuannaarutigilluinnarpara imigassamik hashimillu atornerluisuunerup pinaveersaartinniarnissaanut suliniutinut taama amerlatigisut aningaasanik qinnuteqarsimammata, Peqqissutsimut Attaveqarnermullu Naalakkersuisoq Steen Lynge taama oqarpoq.
Ilaatigut imigassamut hashimullu tunngatillugit unnuit oqalliffiullutillu paasisitsiniaaffiusussanut aningaasanik agguaasoqarpoq. Aamma meeqqat angajoqqaamik angerlarsimaffimmi imigassamik hashimillu atornerluinerisigut misigisaat meeqqat namminneerlutik oqaluttuarnerat malillugu allatatigut assilissatigullu erseqqissaalluni suliniummut tapiissuteqartoqarpoq.
Aningaasaateqarfik Inuneritta Nunatsinni peqqissutsimut suliniutinut siullernut tunngatillugu 2007-imi pilersinneqaqqaarpoq.
Suliniutinut peqqinnerulersitsiniarnermut pitsaaliuinermullu tunngasunut ukiumut marloriarluni aningaasanik qinnuteqartoqarsinnaavoq.
Inuunerittap Aningaasaateqarfianut qinnuteqarnissamut tullianik killigititaavoq 2014-imi apriilip ulluisa aallaqqaataat, tassanilu pujortartarnermut tunngatillugu suliniutit pingaartinneqarumaarput.
