Arfanniarneq pillgu ataatsimiititaliarsuaq, IWC, Amerikami avannarlermi senatorinit arlalissuarnit sakkortusaarfigineqalersoq, Associated Press allappoq.
Amerikami senatorit kissaatigaat, aningaasarsiutigalugu arfanniartarnerup eqquteqqinneqarniarsarineqarneranut akerliunissaq.
Aningaasarsiutigalugu arfanniartarneq ukiuni kingullerni 20-ni inerteqqutigineqarpoq, taamaattoqarnerali japanimiut allanngortiniarsariuarsimavaat, tamanna aamma nunanit arlalinnit illersorneqaleriartorluni. Taamaakkaluartoq nunat akissarsiutigalugu arfanniartarusuttut ikinnerussuteqartuarsimammata, aningaasarsiutigalugu arfanniartarneq IWC-mit ulloq manna tikillugu inerteqqutigineqarpoq.
Aningaasarsiutigalugu arfanniartarneq inerteqqutigitinneqaraluartoq, japanimiut ukiumut arferit 1000-it ilisimatusarnissamut atatillugu pisarisarpaat. Amerikamiut senatoriisa Japanimiut arfanniartarnerat akueriumanagu aningaasarsiutitut arfanniartarnertut taavaat.
Caribiami qeqertaaqqat ilaanni, St. Kitts-mi, IWC-p ukiumoortumik ataatsimeersuarnera tallimanngorpat aallartissaaq.