IWC-p ataatsimiinera ullumi naammassissaaq

Arfanniarneq pillugu ataatsimeersuarnerit 59-sissaat Anchoragemi ullumi naammassissaaq, ataatsimiinneq nunatta nalunaaqutaa malillugu ullumi pingasunut aallartissaaq.

Pilersaarutaavoq Kalaallit Nunaat pillugu oqallinneq aalajangiinertalik ullormut oqaluuserisassani siulliunneqassasoq. Isumaqatiginninniartut pisortaat Ole Samsing neriuppoq kalaallit piumasaqaataat tamakkiisumik tapersersorneqarumaartut, taamaanngippat amerlanerpaamik nunat 20-it missaannik amerlassusillit itigartitsisariaqarput, ataatsimeersuartut 75 procentii akuersillutik arfattassiissappata.

Nunarput maannamut taamaallaat tikaagulliusaanik tikaagullinnillu pisassinneqartarpoq, ukiormannali aamma minnerpaamik arfivinnik marlunnik pisassinneqarnissaq neriuutigineqarpoq.

Amerika kujallermiut nunatta arfivinnik pisassinneqarusunnera nuannarinngilaat, qipoqqarnillu pisassinneqarnissamut piumasaqaat nunatta taamaatiinnarnikuuaa, amerlanerussuteqartumik akuersaartoqarnianngimmat.

Nunatsinneersulli neriupput tikaagulliit pisarnermik 25-nik amerlanerusut pisassiissutigineqarnissaat akuersaarneqarumaartoq.

Tamanna akuersaarneqassappat kalaalit nunaat 200-nik tikaagullittassinneqassaaq.