IWC-mut ilaasortaaginnarnissartik naliliiffigissavaat

Arfanniarneq pillugu ataatsimiititaliarsuup, IWC-p, pingaarutilimmik ataatsimiinnera ullumi aallartissaaq. Ataatsimiinnermi ajornerpaamik pisoqassappat IWC-mut ilaasortaajunnaarrattoqalersinnaavoq, tassami IWC-mit ilaasortaajunnaarnissaq Kalaallit Nunaannit aamma sioorasaarutigineqareerpoq.
marsip 04-at 2010 04:19

Tamatumunnga pissutaavoq, Nunatsinni isumaqartoqarmat, IWC-p arferit eqqissisitaanissaat sulissutigilersimagaa, nungusaataanngitsumik arfanniartarneq suliniutiginagu, soorlu nunat allat aamma taama isumaqartut.

Qulinik qipoqqartassinneqarnissamik Kalaallit Nunaata kissaateqarnera, aamma Kitaani tikaagullittassat ukiormanna 214-iusut, oqaluuserisassanut ilaapput.

Japanip sineriaani niuerutissanik arfanniartarnerup ammaqqinneqarnissaanik Japanip kissaateqarnera oqallisaaqisoq aamma oqaluuserineqassaaq, ullunilu tulliuttuni oqallinnissaq pissanngatigineqaqaaq.

Ataatsimiinneq USA-mi Floridami pissaaq, Nunatsinnillu ilaatigut peqataapput, Piniarnermut Aalisarnermullu naalakkersuisoq, Ane Hansen, Naalakkersuisoqarfiup pisortaa Amalie Jessen aamma Kalaallit Nunaanni Aalisartut Piniartullu Kattuffianni siulittaasoq, Leif Fontaine.

IWC-p ataatsimiinnera aqagu naammassissaaq.