IWC-mut aningaasaliissutit aningaaserivitsigooqqusaalerput
Nunanit siuarsagassanit, Arfanniarneq pillugu ataatsimiititaliarsuarmut ilaasortaasunit, Japanip akiliilluni peqquserluttarsimaneragaanera, pinngitsoortinniarlugu, tuluit suliniutaat inatsisit nutaat arlallit aqqutigalugit iluarsiniarneqassaaq.
Sulianik ingerlatsisarneq ilutigalugu nutarsarneqassaaq, suliniaqatigiiffik ammanerulerniassammat nunarsuarmi suleqatigisatik assiginerulerniassammagit. Arfanniarneq pillugu Ataatsimiitititaliarsuup ukiumoortumik ataatsimeersuarnerani, Tuluit Nunaanni qeqertami, Jersey-imi, pisumi, ippassarlu naammassineqartumi, pingaarnertut tamanna inerniliussaavoq. Nutaarsiassaqartitsivimmi Ritzauimi tamanna allaaserineqarpoq.
Danmark ukioq-manna aamma akerliunerarneqarpoq.
Arfanniarneq pillugu Danmarkimi kommissæri, Ole Samsing, avatangiisinik illersuiniarlutik suliniaqatigiiffiit ukiumoortumik ataatsimiinnerni oqaaseqarnissaannik killilersuiniarnerarlugu pisuutinneqarpoq. Inatsisiliassani nutaani ataaseq qallunaat akerliunerat pissutigalugu suliarineqanngitsoorpoq, BBC nalunaarpoq.
- Suliniaqatigiiffiit naalakkersuisunut attaveqanngitsut qanoq ingasattajaarlutillu akisussaassuseqanngitsigisinnaasut takusareerparput, tusarfiit arlallit sinniisinut Samsing oqarsimanerarpaat, avatangiisinut ingasattajaarluni illersuiniaq, Sea Shepherd Conservation Sociatymeersoq, Paul Watson, taama oqarnermini tikkuarpaa.