IWC-mi ataatsimiinneq: Nunatta siunnersuutaa tupigisutsitsivoq
IWC-mi ataatsimeersuarnermi, Caribiami ingerlanneqartumi, nunarput siunnersuummik saqqummiimmat, ataatsimeersuarnermi peqataasut nunanit allaninngaanneersut niaqqutik ileqimisaartorlutik katangajappaat.
Qipoqqaat arfiviillu kiseqqinneqarnissaat, amerlassusaalu naammassappata piniaqqinneqartalernissaat siunnersuutigineqarpoq. Saqqummiussinerup saniatigut, taasisaqattaarnerit ilaannit, aatsaat siullerpaamik nunat arfanniarfiusartut amerlanerussuteqarput.
Qipoqqarnik arfivinnillu piniaqqittalersinnaanissap misissuiffigineqarnissaa, nunatta saqqummiuppaa, saqqummiussisuuvorlu aalisarnermut pisortaqarfimmi pisortaq Amalie Jessen.
Siunnersuut IWC-mi ilisimatusarnikkut ataatsimiisitaliamut saqqummiunneqarpoq, siunnersuullu akuerineqanngilaq.
Aamma aningaasarsiutigalugu arfanniartarnerup inerteqqutaatinneqarnerata unitsinneqarnissaa ippassaq taasissutigineqarmat, ukiuni 20-ni nunat arfanniarfiusartut ikinnerussuteqartuarsimasut, ippassaq taasinermi ataatsimik amerlanerussuteqarput. Aningaasarsiutigalugu arfanniartarnerup inerteqqutaasinneqarnerata taamaatinneqarnissaanut 33-t akuersipput, 32-llu akerliullutik. Taasinermi amerlanerussuteqarneq sunniuteqarnavianngilaq, IWC-mi inatsisit malillugit, inatsisit suulluunniit allanngortinneqassappata ikinnerpaamik akuersisut 75 procentiusariaqarmata. Taamaakkaluartoq nunat arfanniarfiusartut, taasineq ajugaanertut nalilerpaat.
Arfanniartarnerup inerteqqutaatinneqarnerata taamaatinneqarnissaa, Norge-mit, Japanimit Islandimiillu siunnersuutigineqarpoq, Danmarkillu siunnersuut akuersaaqataaffigimmagu, taamaasilluni Kalaallit Nunaat Savalimmiullu akuersinermi peqataapput.
Qipoqqaat arfiviillu eqqissisimatitaasut, amerlassusaasa misissorneqarnissaat, aammalu piniaqqittalerneqarsinnaanissaat, Kalaallit Nunaata misissoqquaa, taamatullu siunnersuuteqarneq peqquteqarpoq, neqit pissarsiarineqarsinnaasut 670 tonsiusut, taamaallaat tikaagullinnit tikaagulliusaaniillu pissarsiarineqarsinnaammata. Tamannalu Kalaallit Nunaannit naammagineqanngilaq.
Taamaammat Qipoqqarnik arfivinnillu kisitseqqinnissaq, Kalaallit Nunaannit piumasarineqaraluarpoq, siunnersuuteqarnerli nunanit arlalissuarnit uumasunillu illersuiniaqatigiiffinnit akerlerineqarpoq.
Nunatta siunnersuutaa, tassa arferit eqqissisimatitaasut allat marluk piniaqqittalerneqarsinnaanerat, Tuluit nunaanni avatangiisit pillugit ministerip ernumanartutut nalilerpaa.
Qipoqqaat arfiviillu kisinneqarnissaat Kalaallit Nunaata kissaatigaa, kisitsinerillu aappaagu IWC-mit naliliiffigeqqeqquneqarput.
