IWC-ip 2007-mi ataatsimiinissaani qipoqqarniartalernissaq qinnutigineqassaaq
Nunarsuaq tamakkerlugu arfanniarneq pillugu ataatsimiitsitaliarsuup IWC-p 2007-mi ataatsimiinissaani nunatsinni nungukkiartuutaangitsumik qipoqqarniartoqarsinnaanera qinnutigineqassasoq maannamiit suliniutigineqartussanngortoq, piniarnermut pisortaqarfimmi pisortaq Amalie Jessen oqarpoq.
Atlantikup avannaani miluumasut imarmiut pillugit suleqatigiiffik Nammco ataasinngormamiit sisamanngorneq ilanngullugu Norgemi Tromsø-mi ataatsimiimat nunatsinniit peqataasut Kalaallit nunaata imartaata kitaani qipoqqaqassutsimik misissuisoqassasoq pimasaqarput.
Tamatumani siunertaavoq IWC-ip 2007-mi ataatsimiinissaani nunatsinni piniartut amerlanngikkaluanik qipoqqartassinneqartalernissaat anguniarneqartussanngormat.
-Imaasinnaavoq siunissami tikaagullittassat tikaagulliusaartassallu ikilineqariaanaasut, taammaammat nunatsinni neqissaqarniarneq eqqarsaatigalugu qipoqqartassinneqartalernissaq aamma kissaatigineqartoq Amalie Jessen oqarpoq. Ukiumut pisaqartoqartannginnera, marlunnik, tallimanik, qulinilluunniit pisaqartoqartassappat tamanna qipoqqaqassutsimut qanoq sunniuteqassanersoq paasiniarneqassalluni.
Qipoqqaat eqqissisimatitaaneri eqqarsaatigalugit Amalie Jessen oqarpoq, ilumoortoq qipoqqaat ilaatigut illernartuutitatut isigineqarmata. Taammaammallu nunarsuarmioqatigiit qisuariarnissaat aamma piareersimaffigineqartariaqartoq, akerliusoqartuassasorlu ilisimaarineqartoq. Caripeamilu qeqertat ilaat ukiuni arlaqartuni qipoqqarniarsinnaatitaaput immikkut akuerisaalllutik, ukiumut pingasut pisarineqarsinnaasarlutik, ilaannilu pisaqartoqartarani. Taammaammat aamma nunatsinni 80-ikkunni qipoqqarniartoqartarmat piumasaqaatit piareersimaffigineqassasut Amalie Jessen isumaqarpoq.
Kitaata imartaani qipoqqaqassutsimik misissuinissami biologit paasiniagassaat siulliit tassaaput misissuineq qanoq sivisutigissanersoq, misissuineq qanoq akeqassanersoq ilaallu ilanngullugit.
