IWC ingerlaannarsinnaanersoq apeqquserneqarpoq
Arfanniartarneq pillugu nunat tamalaat kommissioniat IWC 57-issaanik ataatsimiilluni ullumi aallartissaaq, ataatsimiinnissarlu Korea Kujallermi pissalluni. Tamanna nalunaatsumik oqaatigineqarsinnaavoq, kommissionili piuassanersoq apeqquserneqarsinnaavoq. IWC-ip inuussutissarsiutigalugu arfanniartarnermut apeqqut qanoq aalajangersaaffigissallugu nalornissutigaa.
- Inuussutissarsiutigalugu arfanniartarneq ukiut marluk qaangiutsinnagit aallarteqqinneqanngippat kommissionip ingerlaannarsinnaanera apeqquserneqarsinnaavoq. Inuit Ataqatigiit sinnerlugit Folketingimut ilaasortaq Kuupik Kleist naliliivoq.
Inuussutissarsiutigalugu arfanniartarneq ukiorpanngortuni inerteqqutigineqarsimavoq, ammaasseqqittoqassanersorlu IWC-mi nunat ilaasortat maanna aalajangersaaffigisussanngorlugu. Inerteqqummut akerliullutik Norge aamma Japan maanna anereersimapput, pissutsillu taamaaginnassappata ilaasortat allat aamma aninerannik kinguneqarsinnaasoq, Folketingimut ilaasortaq isumaqarpoq.
- Kommissionimi ilaasortat illersuiniaqatigiiffimmeersuinnanngorpata kommissioni pisariaarutissaaq, Kuupik Kleist oqarpoq.
Kommissionimut ilaasortaanngitsut nammineq pisassatik amerlassusilersinnaavaat, piujuaannartitsinissamillu paasissutissanik katersisariaqarnatillu piumagunik qassinik pisaqarsimanerlutik nalunaarutigisariaqanngilaat.
