Ivittuut Kommuneani inatsisinik unioqqutitsillutik tuttunniarsimapput
-Uanga naliliisinnaanera naapertorlugu isumaqarpunga, Ivittuut Kommuneani piniarneq aallartinnissaanut, tassa augustip aallartinnissaa sioqqutilaarlugu tuttut takuneqarsinnaasut ilaatigut tammaramik, imaluunniit utersimanerput, taakkua naluara qanoq pisimasut, Ivittuut Kommuneani Piniarnermut Aalisarnermullu Nakkutilliisoq Per Nukaaraq Hansen oqarpoq.
-Taamaalilluni annerusumik tuttunik taakaniittuerukkami. Taavalu piniarneq sioqqutilaarlugu misissuigatta taamaallaat arfinillit takusinnaagatsigit taakaniittut. Taavalu piniarneq sapaatit akunneranik aallartereernerata kingorna pingasuinnaat, aamma kingusinnerusukkut marluinnaat takusimallugit, Per Nukaaraq Hansen oqarpoq.
Tamannalu nunap immikkoortup 11-p avataani unioqqutitsilluni tuttunniartoqartarneranut tunngavigineqarpoq.
-Aamma assorujussuaq ilannguttariaqarpara una, Tuttut toquinnarlugit qimanneqartarnerat, kingulliup tulliani misissuinitsinni ungasinngitsunnguakkut naammattoorpagut tuttut marluk qimaannarneqarsimasut. Kusanartorujussuit marluk, ullormik ataasiinnarmik pisoqaassusillit. Taavalu aamma takusinnaasarpagut, niaqui piiginnarneqarsimasut. Taamaasilluni takuneqarsinnaalluni piniarfioqqusaanngitsumik inatsisinik unioqqutitsilluni pisaqartoqartarnera.
Taamaasilluni aavarfigineqarsinnaasoq nuna killiligaq 11, Ivittuut Kommuneaniittoq, tuttoqanngikkaluartoq pisaqarfiusartutut taaneqarsinnaava?
- Aap, tassa taamatut paasineqartariaqarpoq, Tassa imaappoq, Ivittuut Kommunea tunngaviliullugu taamatut pisaqartoqartarpoq, taannalu unitsinneqarnissaa tamanit kissaatigineqarpoq. Ivittuut Kommuneani Piniarnermut Aalisarnermullu Nakkutilliisoq, Per Nukaaraq Hansen oqarpoq.
Avatangiisinut Pinngortitamullu pisortaqarfimmi siunnersorti, Jørgen Søholm, oqarpoq, inatsisinik unioqqutitsilluni piniarneq ingerlanneqaannassappat, tuttunniarneq oktobarip ulluisa 15-iata tungaanut ingerlasoq maanaannaq unitsinneqassasoq.
