Ivittuuni umimmattassat ikilineqarput
Aalisarnermut, Piniarnermut Nunalerinermullu Naalakkersuisuisoqarfiup aqutsiveqarfinni ataasiakkaani umimmannik ukioq mannamut pisassiissutit agguaanneri piniarnissamullu piffissaliuunneri siornatut iinnarput.
Ivittuunili pisassiissutigineqartut siornamut naleqqiullugit 75-nik ikinnerupput. Umimmaat tamaani 300-it siorna pisarineqarput.
Aqutsiveqarfimmi Maniitsumi, Kangerlussuarmi umimmaat killeqanngitsumik inuussutissarsiutigalugu piniartut sunngiffimmilu aallaaniartartut pisariaqartitatik aggustip 1-ani oktobarip 31-annut pisarisinnaavaat.
Tamaanilu tammajuitsussarsiniarlutik aallaaniartartut pisassaat 500-nut killeqarput. Taakkulu aallaaniarnerat juulip aallaqqaataanit aallartereerpoq.
Avanersuarmi piniartut sunngiffimminnilu piniartut umimmannik Inglefield Landimiittunik Kap Athollimiittunillu katillugit 75-nik amerlassuseqartunik juulip aallaqqaataanit oktobarip 30-anut piniarsinnaapput.
Uummannami Upernavimmilu piniartut sunngiffimminilu piniartut Siggummi ummimmannik 70-nik aggustip aallaqqaataanit oktobarip 15-anut piniarsinnaapput.
Aasianni, Qasigiannguani, Kangaatsiami, Ilulissani Qeqertarsuarmilu piniartut sunngiffimmilu piniartut ummimmannik Naternamiittunik 120-nik pisaqarsinnaapput.
Umimmaat 920-nik ikinnerunngitsut Sisimiut umimmaqarfianniittut Sisimiuni Kangaatsiamilu piniartunit sunngiffimmilu piniartunit pisarineqarsinnaapput.
Aqutsiveqarfimmi Maniitsumi, Kangerlussuarmiittumi umimmaqaqisumi, piniartut sunngiffimmilu piniartut killeqanngitsumik piniarsinnaapput.
Aqutsiveqarfimmi Ivittuuni umimmaat 225-it pisarineqarsinnaapput, taakku Kommuneqarfik Sermersuup nammineerluni piniartunut sunngiffimmilu piniartunut agguaappai. Piniarnermut Naalakkersuisuisoqarfiup nalunaarutaa naapertorlugu umimmanniarneq juulip aallaqqaataanit aallartereerpoq oktobarip 15-ani unitsinneqassalluni.
Illoqqortoormiuni piniartut sunngiffimmilu piniartut ummimmannik 175-nik aggustip aallaqqaatanit oktobarip 15-anut piniarsinnaapput. Naternami, Sisimiut Maniitsullu umimmaqarfiini piffissami tamatumani aamma umimmanniartoqassaaq.
