Ivik Nielsen katinngatilisartuussaaq
14-nik ukiulik nerrivimmi arsaarartartoq kalaallit katinngatilisartorissavaat unnugu Arctic Winter Games ammaanersiorneqalerpat.
- Angusarissaartaleernikuuvoq aammalu suli ukiukikkaluarluni nunat tamalaat unammineranni peqataasalereernikuulluni, GIF-mi allattuuneq Claus Nielsen oqarpoq.
Kalaallit timersortartut 130-it utaqqinerat tamaanga killeqalerpoq. Timersortartut 2.000-it missaanniittut issittumi nunanit qulingiluaneersut ammaanersiornermi peqataassapput aaqqissuisullu Yukon-imeersut isertuuteqqissaarpaat ammaanersiornermi qanoq pisoqassanersoq. Nunat peqataasussat siuttuisa ammaanersiornermi qanoq pisoqarnissaa suli aamma tusanngilaat.
Nunat peqataasut tassaapput: Nunarput, Saamit, Nunavut, Nunavik, Nordvestterritoriet, Yukon, Alberta, Alaska aamma Magadan.
Kalaallit peqataaffigaat arsaanneq, sisoraatinik oqilaniunneq, snowboard, sangusaarneq, volleyball, nerrivimmi arsaararneq, sulorarneq, Arctic Sports aamma Dene Games. Kulturimik takutitsisussanik aamma peqataasoqarpoq.
