Ivigaaraasanik sanaamik arsaattarfiliorniarnermi Qaqortoq siuarsimanersaavoq

Ivigaaraasanik sanaamik arsaattarfeqalernissaa Nuup Kommuneata aalajangereersimagaa, 2,8 millioni koruuninillu tassunga atatillugu immikkoortitsereersimasoq Radioavisimi ippassaani oqaluttuaraarput. Kommunilli arlallit taama aamma pilersaaruteqarput, Qaqortumilu pilersaarutit siuarsimanerpaapput.
aggustip 15-at 2007 05:21

Ivigaaraasanik arsaattarfinnik ilisimannilluartoq Qaqortumut, Sisimiunut, Ilulissanut Nuummullu siorna aggustimi tikeraarsimavoq.

Nuup Kommuneali eqqaassanngikkaanni kommunit allat pilersaarutitik suli piviusunngortinngilaat. Radioavisimit paasiniaanitsinni tamanna erserpoq.

Ivigaaraasanik sanaamik arsaattarfiliornissaq Sisimiuni Ilulissanilu borgmesterit eqqartorsimanerarpaat, piviusunilli suli pilersaaruteqaratik.

Qaqortumili borgmesteri Simon Simonsen naapertorlugu, ivigaaraasanik sanaanik arsaattarfiliornissaq Qaqortumi qangali pilersaarutigineqarpoq. Arsaattarfik taamaattoq 1,5-2 millioni koruunit missaannik akeqartussaavoq, Qaqortullu Kommunea, Danmarkimi Arsaattartut Kattuffiat, DBU, suleqatigalugu aningaasaliisussanik pissarsiorsimagaluarpoq, sulili pissarsinani. Taamaammat pilersaarutit uninngagallarput.

Simon Simonsen naapertorlugu Qaqortumi ivigaaraasanik arsaattarfeqalissanersoq kommunip ukiaru aalajangissavaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq