Ivan Nuumminngaanersoq Ukrainemi toqutaavoq
Kommuneqarfik Sermersuup aamma Namminersorlutik Oqartussat erfalasulerfiini Ukrainemiut aamma Kalaallit Nunaata erfalasui qiteqqusimapput.
Taamaaliortoqarpoq, Ivan Dumanov ataqqiniarlugu eqqaaniarlugulu, taanna Ukrainemi maajip ulluisa sisamaanni ajunaarpoq. Sakkutooqataasa tamanna angajoqqaavinut nalunaarutigigaat, Kommuneqarfik Sermersuup nittartagaani taama allapput
AAMMA ATUARUK Ivan Ukrainimeersoq angerlapallakkusuttoq: Anaanaga ataatalu isumannaatsumukassapput
Ivan Dumavoq Kalaallit Nunaannut tikippoq 2019-mi, kalalalit Nunaanni qimaasutut akuerisaasut siullersaralugu.
Kalaallit Nunaannut tikinnermi kingorna Kommuneqarfik Sermersuup aningaasaqarnermut immikkoortortaqarfiani atorfinippoq, suleqatigisimasaminit ilakkuminartutut oqaatigineqarluni.
Ivan Damanovip ningiorisimasaa Dorthea Olsen Rasmussen tusagassiuutinut nalunaarummi taama allappoq:
- Ivan suleqatigisimasanni ilakkuminarnerpaanut akuuvoq. Ilinniarluarsimasuullunilu poqersuuvoq. Sukkasuumik danskisut ilikkapallappoq, aamma kalaallisut ilikkagaqapallalluni.
Puto Kivioq og Ivan Dumanov sammen på en af deres mange fisketure.
Foto: Puto Kivioq.
Dorthea Olsen Rasmussen nangilluni oqaluttuarpoq Kalaallit Nunaat pinngortitarsuarlu nuannarilluinnaraa Umiatsiaaraateqaramilu angalaallattaajuartartoq.
Ilaquttani nunanilu pillugit sorsukkiarpoq
Ivan Dumanov Ukrainemut aallannginnermini KNR-imut oqaluttuarpoq sooq aallartariaqarnerminik
Ivan Dumavoq ima oqaluttuarpoq:
- Siullermik Kieviliassaanga ilaquttakka isumannaatsumut nuukkiartorlugit, immaqa nunanut allanut. Kingorna paasissavarput sussanerluta, Ivan Dumanov KNR-imut taama oqarpoq.
Tamatuma kingorna Ivan Dumanovip inooqataata Puto Kiviup KNR-imut oqaluttuaraa, Ivan Dumanov russit sakkutuuinut sorsuttunut ilanngussimasoq.
AAMMA ATUARUK Puto Kiviup asasaa Ukrainemut aallarpoq: Suli uumanersoq eqqarsaatigiuaannarpara
Oqarasuaatikkut isigiitigaluni attaviit, Ukrainemut ajoraluaqisut, aappariit arlaleriarlutik oqaloqatigiipput, naak Ivan Dumanov sorsoqataagaluartoq.
Puto Kiviullu takusinnaavaa, Ukrainemi sorsunneq Ivanimut ajortumik kinguneqartoq.
- Aperigaangakku qanoq innersoq ajunnginnerarluni oqartarpoq, kisianni isikkulungaarmat isikkuatigut takusinnaavara ajortoq. Nikallungasoq takusinnaasarpara, Puto Kivioq aappani pillugu oqarpoq.
Ivan Dumanov ajorani angaleqqinnissaa Puto Kiviop neriuutigisimagaluarpaa, kisianni tamanna pisinnaajunnaarpoq.
Ivan Dumanoq 30-nik ukioqarluni toquvoq.
