Ivaaraq nutaassaq sananeqalerpoq

Qaqortumi innarluutillit angerlarsimaffissaat nutaaq kiisami sanallugu aallartinneqarpoq. Massakkullu Ivaaraq nutarterneqariarluni inersimasunut tallimanut inissaqalissaaq.

Innarluutillit angerlarsimaffianni Ivaaqqami sulisut 25-it missaaniitut kissaatigiuarsimavaat nutaamik innarluutilinnut najugaqarfiliornissaq, illu massakkut atorneqartoq nutaangilisimaqimmat atortunullu oqimaatsunut tattorliuuffiulluni. Taamaammat nutaamik sanasoqalernera sulisut nuannaarutigeqigaat Ivaaqqap pisortaa Lise Schmidt oqarpoq.

-Nuannaarutigeqaarput pilersaarut malillugu massakkut sanaartorneq aallartinneqarmat, Lise Schmidt oqarpoq. Pilersaarutit naapertussagaanik Ivaaraq nutaaq aappaagu septemberip qaammataani sanallugu naamassereersimassangatinneqarpoq. Sanaartugaq nutaaliaalluinnartussaq pingasunillu quleriiusussaq innarluutilinnut meeqqanut tallimanut, inuusuttuaqqanullu tallimanut naatsorsuusaavoq, massakkullu illu atorneqartoq nutarterneqariarluni inersimasunut innarlutilinnut tallimanut inissaqalissalluni.

Massakkut Ivaaqqami meeqqat inuusuttuaqqallu arfineq pingasut paaqutarineqarput 25-illu missaanik sulisoqarluni.

Ivaaqqap pisortaa Lise Schmidt nassuiaavoq illu nutaaq atorneqalerpat soorunami sulisut amerlanerit pisariaqartinneqalissasut, oqaatigisinnaanginnerarpaalu sulisut nutaat qassit pisariaqartinneqassanersut, taamanikkussarlu nalunarunnaasasoq Lise Schmidt oqarpoq.

Nutaamik Ivaaraliornermut massakkullu illup atorneqartup nutarterneranut katillugit 26 mio. koruunit aningaasartuutigineqassapput.