Ittoqqortoormiit politikkikkut qitiutinneqaleriasaartut

Ittoqqortoormiit tunup sineraats avannarpasissuaniippoq, immaqalu politikerinit inuinnarnillu soqutigineqarpallaarani. Sapaatit akunneranili uani allaavoq. Kommuneqarfik Sermersumi kommunalbestyrelsi, Nunatsinniillu Danmarkimiillu naalakkersuisut marluk illoqarfimmut tikeraarput.
aggustip 22-at 2013 07:07

Borgmesteri Kommuneqarfik Sermersuumi aningaasaqarnermut ataatsimiititamut ilaasortat ilaat ilagalugit sapaatit akunnerani uani Tunumut tikeraarpoq, Miiti Lyngellu naalakkersuisoqatini Danmarkimeersoq Martin Lidegaard aamma illoqarfimmut avannarpasissumut tikinneqarpallaarnerlu ajortumut tikeraarput.

Naalakkersuisut taakku marluk ilisimatusarfiit Zackenberg aamma Daneborg tikeraarpaat Ittoqqortoormiinullu ingerlaqqillutik. Tassanilu silap pissusiisa allanngoriarneri sammineqarput. Innuttaasut, najukkami politikerit suliffeqarfinneersullu naapippaat, Tunumilu pissutsit qanoq innerinik oqaluttuunneqarlutik. Piniartut ilaat ilaatigut im oqarpoq: “Nalinginnaasumik nannunniarnermi aqqutit maannakkut ingerlavissaajunnaarput. Apuk aakkami”.

 

-Ittoqqortoormiini innuttaasut naapissinnaagakkit, aammalu silap pissusiata allannguutai pillugit misigisaat tusarnaarsinnaagakkit nuannaarutigaara. Ullumi ataatsimiinnitsinni allannguutit pingaartumik piniarnermik inuussutissarsiornermut qanoq allanngortitsisimanerat tusarnaarpara, aammalu inuiaqatigiittut allannguutit taakku ilaannut qanoq iliorluta naleqqussarsinnaanerluta isumassarsiat tusarnaarlugit, Miiti Lynge nassuiaavoq.

Nunatta kangiata avannaani pinngortitaq suli inuussutissarsiorfigineqarnerpaavoq. Sikumi, imaani qaqqanilu piniagassaqarpoq, tamakkulu innuttaasut inuussutigaat. Nunarsuarmilu silap pissusiisa ukiuni aggersuni allanngoriartulernissaannut tunngatillugu Ittoqqortoormiini pigisaanilu innuttaasut periarfissaat killeqaleriartulissapput.

-Piniartut pinngortitamik uumasunillu ilisarisimannilluarput, oqaloqatiginerilu isumassarsilluarnartorujussuuvoq. Oqaluttuaat misilittagaallu angerlaatissavakka, taakkulu siunissami silap pissusiinut naleqqussarniarluta sulinitsinnut atorsinnaavavut.” Ukiut 120-t tikillugit matuma siornatigut tunumiut nunarsuup sinneranit avinngarusimallutik inuusimapput, tamannalu ersarilluinnartunik takussutissaqarpoq. Oqaasii allaanerupput, kulturimi oqaluttuat oqalualaallu tunngavigineqartorujussuupput, ilaatigullu tunumiut sanalugaat pilerigineqarluartut tamatumunnga ersiutaapput, Miiti Lynge Ittoqqortoormiinut tikeraarnermini neriorsuivoq.