Ittoqqortoormiini pisoqartariaqalerpoq
Kommunimi qinigaaffimmi aggersumi nunatsinni illoqarfiit kangisinnersaat sammineqarnerusariaqarpoq.
- Illoqqortoormiut inuussutissarsiornikkut ineriartortinneqarnissaanni ukiorpanngortuni utaqqisimavarput mittarfiup Nerderit Inaanniit Illoqqortoorminut nuunneqarnissaa. Naalakkersuisuusartut assigiinngitsut aamma Naalagaaffik qanoq iliusissamik eqqarsarusaartarsimapput, qanorli pisoqarneq ajorpoq. Utaqqikatappugut. Maanna alloriartariaqalerpugut, Charlotte Pike isumaqarpoq.
Mittarfittaarnikkut aamma takornariaqarnermik inuussutissarsiuteqarneq nukittorsarneqarluni ineriartortinneqarsinnaavoq, unnuisarfiliornikkut, sanaalukkanik sanaartornikkut tuniniaanikkullu, kiisalu kulturikkut sammisaqarfiit allat.
- Piniartut nunamik uumasuinillu ilisimaarilluarnerat atorluarlugu nunamik allanngutsaaliukkamik nakkutilliisutut pikkorissarneqarlutik suliamik ingerlatsilersinnaapput. Aamma Kangerlorujussuatta aalisagaqassusia misissorneqartariaqarpoq aalisarnermullu annerusumik ikaarsaariarnissaq pilersaarusiorneqartariaqarluni, Charlotte Pike nassuiaavoq.