Ittoqqortoormiini inuusuttut sunngiffimminni ornittagartaarput

Kunngissakkut katinnerannut atatillugu nipilersortartup Erann DD-p erinarsuusiaa tunisaammat sinneqartoorutit, Ittoqqortoormiini inuusuttunut tunniunneqarput.

Inuusuttut illumik tunineqaramik, namminneq suleqataanermikkut sunngiffimminni, timersornerup saniatigut allamik ornigassaqalerput. Ornittagaq ”Umimmak” ullumi tallimanut ammassaaq.

Inuusuttoq illumik iluarsaasseqataasoq, Georg Simonsen, 20-nik ukiulik oqaluttuarpoq, illu suliarinialeramikku amigaatai misissoriarlugit qalipaasimallutik.

- Piumassutsinnik ikiuerusussimavunga, inuusuttuaraqatikka qiimmassarniarlugit, namminerlu aamma ikiuerusullunga.

Neriuutigaarput ”Umimmak” ingerlaannassasoq, 1990-i aallartilaarmalli klubbeerunnikuugatta, Georg Simonsen oqarpoq.

Nipilersuutit, qaraasaasiat, DVD pinnguaatillu assigiinngitsut allat aamma periarfissaassasut Georg oqaluttuarpoq.

Pilersaarutaagallarpoq ”Umimmak”,sisamanngornermi, tallimanngornermi arfininngornermilu ammasassasoq.